Njëri prej 5 personave të shoqëruar pasditën e kësaj të Hëne gjatë një operacioni policor në zonën e Saukut, është i dënuari përjetë, Hektor Qiriazi.
Qiriazi është pjesë e një grupi të rrezikshëm vjedhjesh në armë në të kaluarën e tij, kryesisht në shtetin grek. Edhe këtë të hënë, grupi ku bënte pjesë Qiriazi dyshohet se kishin kryer vjedhje në sasi të konsiderueshme parash në vilat private në periferi të kryeqytetit.
Grupi ku bënte pjesë Qiriazi i përbërë kryesisht nga shqiptarë, sipas policisë greke në një njoftim të vitit 2013, akuzohen për vjedhje në banesa, vjedhje makinash, plaçkitje në dyqane, përplasje të armatosur me policinë dhe tentativë vrasjeje.
Nga 7 anëtarët e grupit kriminal që u identifikuan në atë kohë, në pranga ra vetëm Ilir Gjini, ndërsa u shpallën në kërkim Hektor Qirjazi, Lulëzim Elmazaj, Agron Shakaj, Arsen Selimaj, Ervis Arapaj dhe Erion Peçi, që të gjithë nga Shqipëria.
Grupi akuzohej për 3 tentativa vrasjesh, 2 prej të cilave kundër policisë, 1 tentativë grabitje në bankë, 3 vjedhje në familje, 10 plaçkitje në dyqane, 6 vjedhje makinash dhe një tentativë vjedhje në një dyqan bizhuterish.
