Kryeministri Edi Rama po vijon takimet elektorale në Qarkun e Vlorës, nga ku ka akuzuar Presidentin Ilir Meta, se po premton lirimin e kriminelëve nga burgjet në shkëmbim të votave.
Nga Saranda, Rama tha se Ilir Meta vjen në Vlorë për të bërë fushatë skutave me subjektet e OFL, ndërsa ripërsëriti akuzat se qëndron pas grevës së kontrollorëve në Rinas.
“Vjen në Vlorë dhe bën fushatë me subjektet e OFL, me prokurorë e gjyqtarë që i largoi vetting nga sistemi i drejtësisë, premton se do nxjerrë njerëzit nga burgu dhe pastaj thonë se do të zhbëjnë ligjet e pronave”, tha Rama.
Sipas tij, udhëheqësit realë të opozitës janë Ilir Meta dhe Sali Berisha, që i bashkon një ankth i madh, i humbjes së influencës së tyre në proceset politike të vendit dhe më pas përballja me drejtësinë.
“Lulzim Basha nuk është lideri i opozitës, ai fle në këmbë, udhëheqësit e vërtetë janë ato që qëndrojnë pas grevës së kontrollorëve, që bllokuan Rinasin, që bllokuan vaksinat, që bllokuan edhe arkivolët të atyre që do të preheshin në banesën e fundit”, tha Rama.
Pa paraqitur asnjë bilanc dhe program elektoral, Rama ka përqëndruar fushatën për zgjedhjet e 25 prillit në akuzat dhe sulmet ndaj opozitës.
“Ne në 25 prill na gjykon populli, i cili do na japë mbështetjen për vizionin e 2030”, tha Rama, duke shtuar se synohet që Shqipëria e 2030 të jetë kampione e Ballkanit në turizëm dhe eksportet agro-bujqësore.
