Ish-kryeministri Sali Berisha ka publikuar disa denoncime të ardhura në adresë të tij, sipas të cilave, katër persona kanë shfaqur komplikime serioze në shëndet, pas injektimit të vaksinës kineze.
Berisha shprehet se rastet fshihen me urdhër të Ramës.
Në një nga mesazhet lexohet: “Dje ka ardhur me helikopter nga Lura në Urgjencën e QSU Tiranë një grua rreth 67 vjeç me emër Xhevahire Vladi me Tromboze si rezultat i vaksinës Kineze të marre para 2 ditësh në Qendrën Shëndetësore Lurë”.
“Rastësisht isha te Ambulanca e Laprakë doktor, erdhën tre mësues në gjendje shume të rëndë nga vaksinat e Edvinit, i futën direkt ne oksigjen”, lexohet në një tjetër mesazh.
Më herët, është raportuar për dy viktima pas injektimit të vaksinave kineze. Ministria e Shëndetësisë, në një reagim u shpreh se nuk ka asnjë provë që vdekjet kanë lidhje të drejtpërdrejtë me vaksinat kineze.
Një ditë më parë, kreu i opozitës Lulzim Basha tha se, “kemi raportime që numri i atyre që duan të vaksinohen po bie me shpejtësi” dhe se “kemi raportime vdekjesh dhe të sëmurësh pasi janë administruar me një vaksinë”.
