Kryeministri Edi Rama, njëherazi edhe kryetar i PS-së, i ka kërkuar kandidatëve për deputet, në formë urdhëruese, që mos kërkojnë vota për emrin e tyre, por të mbledhin votat për partinë.
Në mbledhjen e zhvilluar përes platformave online me 153 kandidatët e përfshirë në listën e PS-së për zgjedhjet e 25 prillit, duket se problemi që ka shqetësuar Ramën dhe ka krijuar përplasje mes kandidatëve, është fushata që ata kanë nisur në terren, duke kërkuar vota për veten, gjë që duket se ka shkaktuar panik te emrat që ndodhen në vendet e para të listës.
“Shmangni konfliktet e brendshme për vota personale dhe punoni për objektivin e PS”, i është drejtuar Rama, kandidatëve për deputet.
Mësohet se shkak i këtij ultimatumi kanë qenë shqetësimet e ngritura nga disa emra të njohur dhe të panjohur mes kandidatëve, përfshi edhe Qarkun e Tiranës, ku pavarësisht renditjes në vendet e preferuara të listës, kanë ndjerë presionin e kandidatëve që ndodhen në atë që konsidrohet si zona e pasigurtë.
Vetë Rama para disa ditësh, kur prezantoi kandidatët për Tiranën, preferoi të bëjë fushatë për Pandeli Majkon, i cili ndodhet i 19-ti në listën e kandidatëve socialistë në këtë qark.
Ndërkohë shumë prej kandidatëve socialistë, që tashmë kanë zbritur në terren kanë kërkuar vota për emrat e tyre, duke udhëzuar shtabet elektorale, që të promovojnë numrin që kanë në renditjen e listës shumëemërore.
