Këlliçi: Krim elektoral në Tiranë, te Unaza e Re punohet natën pa lajmëruar banorët

Kreu i Forumit Rinor të Partisë Demokratike, Belind Këlliçi, me anë të një reagimi, shprehet se në Tiranë po bëhet krim elektoral.

Këlliçi thekson se tek Unaza e Re punohet natën pa lajmëruar banorët, duke shtuar se qeveritarët po shtrojnë rrugën drejt burgut.

Postimi i Belind Këlliçit:

Krim elektoral në Tiranë!

Prej 2 javësh, në rr. “Milto Sotir Gurra” në Unazën e Re, po hidhet asfalt elektoral. Punimet i bëjnë natën.

Nuk ka asnjë tabelë që informon banorët e lagjes për këto punime. Nuk ka asnjë kontratë, asnjë tender, se nuk pret puna. Duan t’u hedhin hi syve banorëve me një shtresë asfalti që për punë muajsh do çahet si petë byreku.

Me të më njoftuar banorët për këtë maskaradë fushate, telefonova policinë dy herë që të vinin në vendngjarje. Askush nuk erdhi.

I bëj thirrje Prokurorisë së Posaçme SPAK dhe Prokurorisë së Tiranës, të nisin hetimet për këtë krim elektoral që bëhet natën hajdutërisht. Kërkoj vëmendjen e Prezencës së OSBE-së dhe misionit vëzhgues ODIHR në Shqipëri, dhe të ambasadave të shteteve mike, të veprojnë për të ndaluar këtë model abuzimi me taksat e qytetarëve shqiptarë për qëllime elektorale.

Dëshpërimi juaj për pushtet nuk është asgjë krahasuar me dëshpërimin ekonomik të qytetarëve që kanë pritur 8 vjet për të parë punët tuaja.

Po shtroni rrugën drejt burgut.

LEXO EDHE  Iu gjetën 7 kg kok*inë në banesë, ja çfarë e tradhëtoi shqiptarin