Kreu demokrat Lulzim Basha e cilësoi si bashkimin e madh të ndryshimit mitingun e sotëm të hapjes së fushatës së Partisë Demokratike.
Basha tha se ekipi i koalicionit opozitar është ai i fitores dhe ndryshimit për çdo shqiptar.
“Edhe 31 ditë për të nisur sëbashku rrugën e ndryshimit të Shqipërisë. Jemi të gjithë bashkë dhe jam mes jush, për ti dhënë fund tranzicionit shqiptar, të hapim një faqe të re të historisë së Shqipërisë”, tha Basha.
Sipas tij, Shqipëria ka nevojë sot më shumë se kurrë për punë, nder dhe ndryshim rrënjësor.
“Më shumë se kurrë se duhet të mbrojmë dhe të vendosim në vendin e duhur krenarinë tonë si shqiptarë”, tha Basha, duke shtuar se “Shqipëria ka qenë kryelartë gjithmonë në shekujt e trazisë së vet. Do të ndalim sot dorën që vret shpresën e shqiptarëve”.
Ai tha se u bë më shumë se 1 vit që kemi nisur rrugëtimin për të ndryshuar vendin tonë.
“Po shkulim dhe çrrënjosim një kastë, një grusht që ka vendosur të përvetësojë të gjitha burimet që Zoti ia ka falur Shqipërisë. Do të bëjnë gjithçka që ata të mbajnë karriget e tyre, por ne do të sjellim ndryshimin”, tha Basha.
Ai tha se gjatë takimeve në çdo qytet të Shqipërisë ka parë shpresën për ndryshim. “Kam lexuar në sytë tuaj një nxitje dhe forcë të papërsëritshme, për të ecur përpara, për ti dhënë fund vuajtjes. Jemi gati për një ndryshim të madh”, tha Basha, ndërsa akuzoi qeverinë Rama se vrau shpresën dhe besimin e shqiptarëve.
