Policia e Shkodrës njoftoi sot zyrtarisht se ka zbardhur ngjarjen e ndodhur mbrëmjen e djeshme në Shkodër, ku mbetën të plagosur dy vëllezër.
Nga konflikti me armë mes 3 shtetasve mbetën të plagosur vëllezërit Hoten dhe Marjan Doçi, të cilëve u është komunikuar ndalimi në ambientet e spitalit.
Policia ka shpallur në kërkim shtetasin Besim Perkola, i cili ka qëlluar me automatik, pasi vëllezërit Doçi e kishin gjuajtur fillimisht me armë.
Policia ka ndaluar si të përfshirë në këtë ngjarje edhe dy vëllezërit Doçi, të cilët aktualisht ndodhen në spital, jashtë rrezikut për jetën. Shtetasi Besim Perkola është banues në fshatin Bardhaj në Shkodër, ndërkohë që Policia vijon punën për kapjen e tij.
Njoftimi i policise:
Vihen në pranga dy vëllezërit Doçaj që mbetën të plagosur mbrëmjen e djeshme gjatë një konflikti me armë zjarri.
Shpallet në kërkim autori i plagosjes së dyfishtë me armë zjarri.
Në vijim të veprimeve për zbardhjen e ngjarjes së ndodhur mbrëmjen e djeshme në fshatin Bardhaj, në përfundim të veprimeve të para hetimore u bë arrestimi në flagrancë i shtetasve M. D., 26 vjeç dhe H. D., 31 vjeç, banues në fshatin Bardhaj, Shkodër, si dhe u shpall në kërkim shtetasi B. P., 29 vjeç, banues në fshatin Bardhaj, Shkodër.
Nga veprimet hetimore rezultoi se:
Më datën 20.03.2021 rreth orës 19.30, në fshatin Bardhaj Shkodër, gjatë një konflikti për motive të dobëta shtetasit M. D. dhe H. D. kanë qëlluar me armë zjarri në drejtim të shtetasit B. P. i cili i është kundërpërgjigjur duke qëlluar me armë zjarri automatik, ku për pasojë mbetën të plagosur jashtë rrezikut për jetën dy vëllezërit ndërsa shtetasi B.P., u largua nga vendi i ngjarjes dhe u shpall në kërkim.
Vijon puna intensive për kapjen e shtetasit B.P.
Në vendin e ngjarjes janë sekuestruar prova materiale që shërbejnë për dokumentimin e plotë të ngjarjes si dhe mjeti tip Audi, i shtetasit M.D.
Materialet iu referuan Prokurorisë së Rrethit Gjyqësor Shkodër në ngarkim të shtetasve M. D. dhe H. D. për veprat penale “Vrasje me paramendim, e kryer në bashkëpunim, mbetur në tentativë”, si dhe “Mbajtje pa leje të armëve dhe municioneve luftarake”, ndërsa për shtetasin B. P. për veprat penale të “Vrasje në rrethana cilësuese, e mbetur në tentativë”, dhe “Mbajtje pa leje të armëve dhe municioneve luftarake”.
