Vllaznia luan nesër kundër Kastriotit në transfertë në ndeshjen e vlefshme për javën e 25-të të Kategorisë Superiore.
Në prag të kësaj sfide ka folur mbrojtësi i shkodranëve, Dajan Shehi. Ai e di mirë forcën e kundërshtarit, por ka besim se gjithçka do shkojë në rrugën e duhur.
“Jam i kënaqur sepse trajneri po më mbështet. Besoj se edhe unë i kam treguar trajnerit se kam shumë cilësi dhe gjithmonë kam pritur mundësinë time. E falënderoj trajnerin që po ma jep atë dhe shpresoj që t’ia shpërblej sa më mirë.
Trajneri e vendos se kush luan, besoj se edhe nesër do të jem në fushë dhe do të jap më të mirën për ekipin.
Kam luajtur më përpara me Kastriotin, është një kundërshtar shumë i fortë. Dihet se ka bërë mirë në këtë kampionat dhe besoj se nesër do të jetë një ndeshje shumë e luftuar dhe jam shumë i bindur se nesër do të dalim me tre pikë nga fusha e lojës.
Çdo ndeshje ka rëndësinë e vet dhe në secilën duhet të luftojmë të marrim një rezultat pozitiv dhe këtë gjë do të tentojmë që nesër ndaj Kastriotit ku do të synojmë fitoren. Nuk ka ndeshje të lehta, por jam i sigurt se në këtë sfidë, skuadra do të japë më të mirën në fushë dhe do të marrë rezultatin e duhur. Vllaznia ka një skuadër shumë të mirë, të kompletuar dhe ka një stol shumë të mirë dhe gjithmonë lojtarët që janë futur nga stoli në fushë kur ka pasur mungesa, kanë dhënë më të mirën e tyre për ekipin dhe kështu besoj se do të ndodhë edhe nesër.
