Kryeministri Edi Rama nga Kukësi ka kritikuar sërish grumbullimet e qytetarëve në takimet elektorale të kreut të PD-së, Lulzim Basha.
Rama kërkoi që të respektohen protokollet e pandemisë, ndërsa e cilësoi si “harbim dasmorësh nëpër rrugë” mënyrën sesi po bën fushat kreu i opozitës.
Gjatë takimit me strukturat ku prezantoi kandidatët për qarkun e Kukësit, Rama tha se ata duhet të jenë shembull, duke mos treguar papërgjegjëshmëri që do të ndikojë në shëndetin e qytetarëve.
“Duhet të respektojmë rregullat. Duhet të shmangim tundimin që të grumbullohemi dhe të ekzaltohemi sepse është e rrezikshme. Teksa ne po vaksinojmë është e domosdoshme të tregojmë përgjegjshmëri dhe të jemi forca e shembulli.
Është e pakuptimtë që vazhdon harbimi i dasmorëve nëpër rrugët e Shqipërisë, me Lulin e kthyer në një dhëndër që medet ia ndalpjnë makinën në mënyrë spontane njerëzit e nuses dhe e ngrejnë në krahë si dhëndër i bukur. Skena është po ajo me flamuj, me dy gishta me sharje. Nuk i adresohen dhëndrit, por në drejtimin tonë.
Problemi është të ruajmë shëndetin dhe të mos biem në këto nivele. Nuk ka mundësi që dikush që pretendon të drejtojë vendin të sillet rrugëve si Borati me kamerat nga mbrapa në një situatë do të ishte komike nëse nuk do të ishte e rrezikshme për shëndetin e njerëzve.
Me këtë po e mbyll, rrugët e komunikimit dhe mundësia për të folur me njerëzit kudo janë aty dhe të panumërta. Ne do jemi të kujdesshëm në respektimin rregullave”, tha Rama.
