Ivi Kaso, Sekretari për Çështjet Zgjedhore në PD, akuzoi Kryeministrin Edi Rama se po tenton të vjedhë zgjedhjet, pasi rezulton humbës jo vetëm në Tiranë por në të gjithë vendin.
Kaso, referuar denoncimit në një prej emisioneve investigative, ku u shfaqën provat filmike se si Erion Veliaj dhe Edi Rama kanë importuar mijëra vota në Tiranë, tha se është e pamundur të ndalosh qytetarët shqiptarë, të cilët duan ndryshimin dhe kjo po e tërbon Edi Ramën.
“Importimi i votuesve me kontrata fiktive të shtëpive, tregon se Edi Rama nuk luan me rregulla të ndershme loje, sepse ai ka frikë nga humbja.
Loja e pistë me importimin e votuesve nga qytetet e tjera më Tiranë, nuk do ta ndihmojë Ramën. Ai do të humbë kudo – në Tiranë, Elbasan, Durrës, Shkodër, Korçë, në Fier, kudo.
Në mënyrë që të sjellim një ndryshim të vërtetë për vendin tonë, ne duhet të fillojmë rrugën e sigurt drejt Bashkimit Europian. Mënyra e vetme për të bërë këtë është të votohet për Partinë Demokratike nën udhëheqjen e Lulzim Bashës.
Të nderuar qytetarë, dilni dhe votoni!
Së bashku ne do të sjellim ndryshim dhe një të ardhme më të mirë për të gjithë ne!”, tha Kaso.
