Nga Boldnews.al
Kryeministri Edi Rama aty ku kandidon vetë e qepi listën e të singjashmëve të tij. Nuk pati asnjë surprizë, Durrësit nuk i ndahet krimi i organizuar, duke veshur me petkun e deputetit personazhe që SPAK-u i ka në dosjet e tij, por as ka ndërmend të shfletojë ato çështje.
Ku ka krim dhe pak orë përgjim, është e pamundur të mos dalin personazhe të pushtetit, deputetë, ministra dhe drejtues lokal. Në dosjen hetimore të çështjes Shullazi, deputeti i sotëm i PS-së Jurgis Çyrbja, kur mbante postin e kreut të Hipotekës Durrës, u përfshi në skandalin e tjetërsimit të Hotel Vollgës.
Në disa episode, ai del në përgjim me Gilmando Danin, sot i dënuar për gjobëvënie në kuadër të grupit të strukturuar kriminal. Nuk mjafton vetëm lidhjet e tij me elementë të njohur të botës së krimit, por dekonspiron edhe punën e prokurorisë. Në një tjetër përgjim ai flet me Danin dhe i thotë: “E kemi keq punën, lidhet me detyrën time”- këtë komunikim e bën fill pasi hetuesit kishin dalë nga zyra e tij dhe për këtë çështje i kërkon që të takohen.
Po Çyrbe tapi siç njihet ndryshe, sot është i treti në listën e qarkut Durrës. I përzgjedhur nga vetë dora e Edi Ramës i cili edhe listën e këtij qarku që kandidon vetë nuk tentoi ta pastrojë, përkundrazi përfshiu personazhe të cilët janë hetuar dhe akoma më rëndë po hetohen për pastrim parash apo lidhje me krimin e organizuar në tjetërsimin e votave.
Nuk kishte si të mungonte Rrahman Rraja. Nëse për të do të kërkoni ndonjë fjalim në Parlament mos e merrni mundimin, pasi nuk ka, asnjë të vetëm në këto katër vite. Vjen nga Nikla dhe aty konsiderohet oazi i tij, duke e shtrirë ndikimin edhe në Fushë-Krujë. U bë i njohur i biri i tij Rexhep Rraja, i cili u arrestua sepse torturoi dhe dhunoi një vajzë të cilën e konsideronte si të dashurën e tij.
Ai kishte një “metodë” efikase që pasi e dërgonte në një dhomë të ndyrë moteli, kryesisht në aksin e Fushë-Krujës, e rrihte dhe i fikte cigaret në trup. Vajza denocoi, por punonjësit e policisë së Komisariatit të Krujës në vend që ti tregonin prangat dhunuesit, ushtronin trysni mbi viktimën. Ajo u detyrua të bënte një kallëzim penal në Durrës dhe pasi çështja u bë mediatike, Rama u detyrua që për të shuar mllefin qytetar, ta lëshonte për pak kohë “Xhepin” e tij.
Ai qëndroi as katër muaj në burg. Ndërsa ishte me pranga në duar Rexhep Rraja, djali i Rrahman Rrajës, kërcënoi liderin e opozitës se: “ta provojë në zgjedhje Lulzim Basha”. Ndoshta këtë shprehje ka pasur vath në veshin e tij të majtë Edi Rama, kur Rrahman Rrajën e renditi të gjashtin në listë, duke lënë poshtë edhe Terin, mikun e “idealeve të pushtetit” dhe jo moralit politik.
Po sot emri i Rrahman Rrajës është i regjistruar edhe në SPAK, ai po hetohet për pastrim parash pasi dy nipërit e tij u kapën në Holandë si pjesë e një grupi të strukturuar kriminal në trafikun e drogës dhe dyshohet se paratë e fituara nga ky aktivitet i kanë pastruar duke i ndihmuar xhaxhai i tyre, sot deputet dhe kandidat për deputet, në krahun e djathtë të Ramës.
Lista e dyshimtë në Durrës nuk përfundon me këta dy personazhe. Nuk kishte si të lihej pas zona e Shijakut me përfaqësuesin e tij Ilir Ndrazhi. Edhe për të vështirë të gjendet ndonjë fjalim apo qëndrim në Parlament, por që ishte deputet u kuptua në audiopërgjimet e dosjes 339 me protagonist Astrit Avdylajn i dënuar për vrasje dhe trafik narkotikësh dhe “akulloren e Durrësit”, ish-kryebashkiakun.
Ndrazhi përmendet nga Astrit Avdylaj dhe flet se po “bënte listën” për zgjedhjet e vitit 2017 dhe Ilir Ndrazhi do të ishte patjetër… Ta thotë ai Titi Shijakut dhe Rama mos e ketë në konsideratë? Amaneti i Avdylajt për të përfshirë në listë Ndrazhin dhe për të bërë kryebashkiak Elton Arbanën që e urdhëronte si “çerrin e grupit” Rama nuk e ka harruar. Rama i di rregullat e tavolinës dhe fjala e lacave nuk bëhet dysh, ka nisur t’i pëlqejë edhe vetë jeta e krimit të organizuar kur përfshihet në politikë. Kushdo që e ka për zemër krimin dhe politikën të votojë në Durrës, aty ka plot personazhe që personifikohen me listën e kandidatëve të PS-së.
