Dy qytetarë të Kavajës janë ndarë nga jeta ditën e sotme pasi humbën betejën me koronavirusin. Viktimat janë efektivi i policisë Harun Hasa dhe doktori Mehmet Demrozi.
Efektivi i policisë u nda nga jeta në moshën 54-vjeçare.
Disa ditë pas infektimit gjendja e tij u rëndua duke mos e përballuar sëmundjen.
“Ndahet nga jeta në moshën 54 vjeçare efektivi i Policisë Harun Hasa. Ngushëllime Familjes dhe miqve! Qoftë i Xhenetit” shkruan një nga faqet e qytetit të Kavajës në rrjetin social.
Ndërkohë gjatë paradites ndërroi jetë doktori i njohur i qytetit, Mehmet Demrozi.
“Trishtim. Sot u nda nga jeta një tjetër mik i qytetit! #COVID19 nuk e kurseu Doktorin e nderuar Mehmet Demrozi që i shërbeu plot përkushtim e devotshmëri të rrallë banorëve të Kavajës tonë gjatë gjithë jetës së tij profesionale.
Ishte në pension dhe prapë në vend të rehatisë, zgjodhi të rikthehej në detyrë sepse qyteti i tij kishte nevojë për të. Ngushëllimet më të sinqerta familjes me urimin se Zoti do i japi forcë për ta përballuar dhimbjen e humbjes!
Pushofsh në paqe doktor Meti!..”, thuhet në një tjetër postim.
