Plani për ri ngritjen e Barcelonës nis me Erling Haaland, për këtë e sigurt e përditshmja spanjolle “AS”. Nuk është ende e qartë nëse do të jetë ai zëvendësuesi i Leo Messit apo do jetë përkrah “pleshtit” sezonin e ri.
Presidenti Joan Laporta premtoi se çështja e parë që do të merret personalisht është ajo e Leo Messit, rinovimi i kontratës me yllin argjentinas. Me apo pa Messin, objektivi tjetër i rëndësishëm është sulmuesi i B.Dortmund, por më parë duhet të gjejë mënyrën e duhur për të qenë aktiv në tregun e transferimeve pasi për momentin Laporta ka trashëguar një borxh të frikshëm, 1.173 miliard euro.
Eliminimi në Champions nga PSG e ndërlikon akoma më shumë këtë pjesë por Laporta ka një plan për të futur në klub obligacione për të pasur në këtë mënyrë parat e nevojshme për të operuar.
Presidenti i ri është i qartë se në çdo rast, për të dalë nga kriza i duhet një ekip fitues, për ketë arsye nuk do të kursehet në merkato. Haaland është vendosur në majën e listës së dëshirave ndërsa në shënjestrën e klubit kanë përfunduar edhe elementë të tjerë me shumë peshë si Alaba apo Depay.
