Pas 23 javëve kampionat, Vllaznia vijon të mbajë kreun e Kategorisë Superiore me 42 pikë, një më shumë se Laçi e Teuta, dhe tre mbi Partizanin.
Kuqeblutë kanë gabuar në javët e fundit, por vazhdojnë të kryesojnë Superioren dhe do të luftojnë deri në fund për titullin kampion. Një sezon më parë, Vllaznia renditej në vend të tetë, pozicion ku edhe e mbylli sezonin.
Sponsori i klubit shkodran, Alban Xhaferi ka reaguar me anë të një postimi në rrjetet sociale, duke qetësuar tifozët e shumtë të Vllaznisë në lidhje me projektin e ri.
“Miq dhe dashamirës. Dua t’ju siguroj që kemi ambicien e plotë për të vazhduar fuqishëm projektin tonë: Rikthim tek Suksesi.
Kjo që kemi nisë nuk është vetëm për sot, por edhe për të ardhmen, ndonëse ajo që sot të gjithë po shohim dhe po prekim, është një Vllazni që kryeson në vendin e parë dhe për më tepër është konkurruese dhe e denjë me çdo ekip!
Bashkë me ju kemi ndarë çdo fitore por edhe humbje, dhe synimi jonë është që Vllazninë ta çojmë aty ku e meriton. Sigurisht që ka kritika shumë e shumë me vend, të cilat na ndihmojnë që të përmirësohemi, por edhe dashakeqësi jo pak që duan të hedhin balte për këtë projekt serioz.
Me ndihmën e Zotit, me kurajo, me durim, dhe bashkuar si një VLLAZNI, do ecim përpara dhe më të fortë. Forca Vllaznia“, shkruan sponsori i klubit shkodran. /abcneës.al
