Pas takimit me ambasadoren Yuri Kim, kryetarja e LSI, Monika Kryemadhi ka treguar për gazetarët se çfarë u diskutua me diplomaten amerikane.
Ajo tha se prioritare është fushata elektorale në qytetin e Elbasanit dhe në të gjithë Shqipërinë. Kryemadhi zbuloi se ka ngritur shqetësimin e presionit të institucioneve shtetërore si dhe ka denoncuar tek ambasadorja amerikane faktin që prokurori i Elbasanit ka vëllain e tij në listën e Partisë Socialiste.
Kryemadhi tha gjithashtu se në Qarkun e Elbasanit LSI pretendon të marrë 4 deputetë.
Gazetari: Zonja Kryemadhi u relaksuat me ambasadoren?
Kryemadhi: Sigurisht që u relaksuam. Mund t’iu them që shqiptarët paguajnë më shumë taksa, shqiptarët kanë një jetë shumë më të shtrenjtë seç kishin 4 vite më parë, shqiptarët sot po ikin nga Shqipëria, shqiptarët sot ndihen më të pasigurt prandaj më 25 prill pajisuni me kartat e identitetit të shkojmë drejt fitores.
Gazetari: Çfarë u diskutua me ambasadoren?
Kryemadhi: Konkretisht me ambasadoren diskutuam për situatën e fushatës elektorale në qytetin e Elbasanit dhe në gjithë qarkun e Elbasanit. Ajo që ne diskutuam është shumë e rëndësishme, ka rëndësi që t’i krijojmë shanse dhe mundësi të gjithëve që të votojnë, të mos ushtrohet presion institucioneve shtetërore duke filluar me ndihmën ekonomike, me konfliktin e interesit që ka prokurori i Elbasanit sot që ka vëllain e tij në listën e Partisë Socialiste, për të vazhduar më tej me krijimin e mundësive që të ketë sa më shumë gra dhe vajza që të jenë pjesë e gjithë asaj që është e domosdoshme.
Mos harrojmë që Elbasani është qyteti më elitar, edhe më shumë se Tirana për sa i përket intelektualëve, forcës së gruas, forcës së vajzave, forcës së rinisë. Dhe tjetra ajo që është e rëndësishme, mendoj që lista fituese e LSI i jep një shans të jashtëzakonshëm të rinjve dhe të rejave, i jep një shans grave dhe vajzave për të qenë ato që do të vendosin për të ardhmen e Shqipërisë.
Gazetari: Sa deputetë do të marrë LSI në Elbasan?
Kryemadhi: 3.5 jemi që tani, po luftojmë për të katërtin.
Gazetari: Këto janë projeksione siç i ka Edi Rama 8 deri në 9?
Kryemadhi: Jo, Edi Rama Taulantin ka të 8, kështu që mos kini merak.
