Ministri serb bën deklaratën bombë: Tentuan të më heqin qafe, ja çfarë m’i bënë makinës

Ministri serb i Familjes dhe Demografisë, Ratko Dmitroviç ka deklaruar ditën e sotme se dikush është përpjekur për ta hequr qafe, duke i ndërhyrë në gomat e makinës së tij.

Ai pretendon se dikush i ka hequr vidat e gomave të makinës. “Kur dikush heq vidat nga gomat e makinës suaj, ai sigurisht nuk dëshiron t’ju urojë për ditëlindje, por t’ju vrasë,” u shpreh ai për “Tanjug”, teksa komentoi incidentin që i ndodhi kur po kthehej nga një takim pune në Nish. Ndërkohë shtoi se hetimet e nisura ende nuk kanë dhënë asnjë rezultat.

Dmitroviç po kthehej nga një takim në Nish më 22 shkurt, por para se të hynte në autostradë për në Beograd, goma doli nga vendi duke shkaktuar një incident, fatmirësisht pa të lënduar. Në një intervistë me Tanjug, ministri shtoi se kishte dyshime për disa persona që mund të donin “zhdukjen’ e tij por priste punën e drejtësisë.