Kreu i PD Lulzim Basha, ka zhvilluar sot një takim me studentët dhe përfaqësues të ‘European Democrat Students’. Basha tha se në fytyrat e të rinjve shikon shpresë, besim për fitoren e 25 prillit.
Kryedemokrati theksoi se fitorja e së mirës në Shqipëri, gjithmonë ka pasur fytyrën e rinisë.
Lideri i opozitës theksoi se 8 vitet e fundit kanë qenë të vështira për shkak të keqqeverisjes nga Rama, ndërsa shtoi se 75 për qind e të rinjve duan të largohen nga vendi.
Më tej, Basha tha se 94 për qind e atyre që studiojnë jashtë, nuk duan të kthehen më në Shqipëri. Lidhur me këtë, Basha tha se që të fitojë rinia, duhet larguar kryeministri Rama.
“Rama ka marrë peng fatet e rinisë shqiptare. Ligji i arsimit të lartë u konceptua si një ligj për të nënshtruar rininë. Akti i parë në programin tonë është abrogimi i ligjit për arsimin e lartë. Ligj i ri i përmasave dhe parimeve europiane. Ne do të bëjmë të mundur përmes këtij ligji autonominë universitare.
Do t’i kthejmë këto universitete në qendra përgatitjeje për hapat e tjerë që ju presin në jetë. Unë e ndjej si misionin tim personal të bëj gjithçka për ta ndalur këtë hemorragji. Çdo i ri dhe e re do të ketë mundësinë të studiojë pavarësisht mundësive ekonomike.”-tha Basha.
Tobias Rüttershoff, drejtor i Konrad Adenauer Stiftung tha; “Përdorni të drejtën tuaj për të votuar!” – ndërsa shtoi se “nëse nuk e përdorni votën tuaj dikush tjetër do të fitojë”
Carlo Angezano, kryetar i EDS, organizata zyrtare e studentëve të EPP shtoi se ju duhet të drejtoni rrugën drejt ndryshimit!
“Merrni kontrollin e së ardhmes tuaj në 25 Prill! Ju jeni me fat që keni një udhëheqës si Lulzim Basha. Lulzim Basha, politikan i ri, energjik, i cili ka bërë kaq shumë për vendin e tij.
Familja EPP beson te Basha. Lulzim Basha ka besimin e duhur, arsimin perëndimor që do të përmbushë sfidat me të cilat përballet ky vend.“-tha Angezano
