Presidenti Ilir Meta ka komentuar Rezolutën për Shqipërinë në Komisionin e Politikës së Jashtme të Parlamentin Europian, dhe konstatimet se shit-blerja e votës duhet dënuar, e se zgjedhjet e lira e të ndershme janë kusht për integrimin.
Në një konferencë për mediat, Meta tha se rezoluta veçse thekson edhe njëherë problemet e mëdha që ka Shqipëria, korrupsionin, si dhe tentativat e qeverisë për të cënuar lirinë dhe demokracinë. “Kjo rrëzon çdo alibi se fajin e ka Europa”, – theksoi presidenti.
Kreu i shtetit gjithashtu tha se rruga europiane kalon vetëm përmes plotësimit të të gjitha kushteve, dhe se mbarëvajtja dhe cilësia e zgjedhjeve më 25 prill duhet të jenë prioritare.
“PE rikujtoi edhe njëherë se dosjet për krimet zgjedhore nuk do të harrohen. Liria e medias që vazhdon të jetë në një trysni përbën një tjetër vijë të kuqe për Shqipërinë. Përdorimi i Shqipërisë si lavatriçe e pastrimit të parave është alarmante. Kjo rrëzon çdo alibi se fajin e ka Europa. Jam i bindur se populli shqiptar vazhdon të gëzojë mbështetjen e Europës”, – tha Meta.
