Analisti Armand Shkullaku ka deklaruar mbrëmjen e sotme në emisionin “Zonë e Lirë” se mandatin Kryeministrit Edi Rama nuk ia japin intelektualët, por Avdylajt.
Duke folur për prezantimin e Luljeta Bozdos dhe Najada Çomos si kandidate për zgjedhjet e ardhshme nën logon e PS-së, Shkullaku theksoi se Rama përpiqet t’i përdorë intelektualët.
Ai gjithashtu shtoi se personalitetet kur angazhohen në politike kanë parimet e veta dhe sipas atij, një urbanist nuk mund të bëhet me Ramën kur shikon si është katandisur Tirana, ndërsa për shefen e infektivit, Shkullaku u shpreh se ajo nuk mund të bëhet me Ramën sepse e di shumë mirë sesi është gjendja e spitaleve.
“Po nuk qe Avdyli nuk ecë o zotëri. Mandatin ia japin Avdylajt jo intelektualët. Nuk është problemi pse Rama i përdor këta. I thotë pensionistëve që duke marrë zonjën Bozdo, po marrim profesionistë. Efekti është zero. Nuk duhet ta hanë shqiptarët. E hëngrën një herë, e hëngrën dy herë, nuk duhet ta hanë më. Ky i përdor këta. Me gjithë respektin që kam për Zonjën Bozdo. Personaliteti kur angazhohet ka disa parime të vetat. Si mundet një urbanist të bëhet me Edi Ramën kur shikon si është katandisur qyteti. Një mjeke e nderuar si Çomo nuk e di çfarë ndodh në spitale?! Nuk i di ajo koncesionet?!” deklaroi Shkullaku.
