Besnik Baraj, deputet i PS dhe ish-kryetar i kësaj partie për Tiranën, ka njoftuar largimin nga politika. Përmes një postimi, Baraj shkruan se nuk ka plotësuar formularin për të kandiduar për deputet, sikundër bën të ditur largimin e tij nga politika, ku u përfshi prej më shumë se dy dekadash.
“PS është një forcë progresiste, ajo ka ulur në karrigen e kryeministrit edhe 28 vjeҫarë, por njëkohëshit fton për deputete edhe një grua brilante, 78 vjeҫare, si Luljeta Bozo.
Sot ka mjaft të rinj të përfshirë apo që aspirojnë të përfshihen në politikë. Do uroja që tek ta të kultivohen tre elementët që përmenda, ndershmëria, idealizmi dhe profesionalizmi. Rendja pas fitimit, pasurimit abuziv është tipar kompromentues i shoqërisë tonë. Shoqëria jonë, partitë politike duhet të ngrenë mekanizma si të kultivojnë profesionalizmin, idealizmin dhe ndershmërinë tek të rinjtë në përgjithësi dhe ata të përfshirë në politikë, në veҫanti. Sigurisht, rol në këtë drejtim luan edhe një drejtësi e konsoliduar.
Nisur nga afrimet e reja në PS, e për t’u krijuar hapësira atyre, kam vendosur të mos plotësoj formularin për kandidimin si deputet. Shpresoj ta kem justifikuar besimin që më është dhënë në kryerjen e kësaj detyre e mos të kem zhgënjyer njeri”, shkruan ndër të tjera Baraj.
Duket se deputeti i PS ka zgjedhur rrugën të vetëlargohet në kushtet kur ai dhe shumë të tjerë po zëvendësohen nga Kryeministri Edi Rama me emra që në momente të vështira u angazhuan në profesionet e tyre, ndërsa sot po përdoren si fasadë nga Kreu i Qeverisë. Kjo ndodhi me Najada Çomon, mjeken e infektivit, që uu shfaq si shpëtimtare në rastin e pandemisë, por u përdor në një luftë politike ndaj denoncimeve nga opozita, si dhe Luljeta Bozos, e cila u angazhua në procesin e rivlerësimit të dëmeve nga tërmeti i 26 nëntorit. Si tërmeti ashtu edhe pandemia po përdoren politikisht nga Edi Rama, përfshi këtu edhe personazhe që u angazhuan, në emër të interesit publik, por që po rezulton angazhim në emër të Rilindjes.
