FSHF përgatit dënimin shembullor për arbitrin e takimit Kukësi-Laçi

Kukësi humbi ndaj Laçit me një penallti mjaft të dyshimtë që kryesori Klajdi Kola akordoi në dëm të kuksianëve. I irrituar në maksimum për arbitrimin e kësaj ndeshjeje, presidenti Safet Gjici akuzoi ashpër kryesorin e ndeshjes, si një gjyqtar tendencioz dhe kamikaz ndaj skuadrës së tij.

Madje, në deklaratën e dhënë për “Panorama Sport” menjëherë pas ndeshjes në “Elbasan Arena”, Gjici ka akuzuar Kolën se sa herë që ka arbitruar ndaj verilindorëve, ka favorizuar ekipet kundërshtare.

Në prononcimin e tij pas këtij 90- minutëshi, ku vendimmarrja e arbitrit ishte e tillë që vendosi edhe rezultatin e ndeshjes, Gjici është shprehur se pa arbitrin, Laçi nuk do të kishte fituar dot. Kreu i klubit ka kërkuar publikisht që ky gjyqtar të dënohet. Darkën e së mërkurës drejtuesit e Kukësit kanë marrë vendim që të mos e lenë vetëm te reagimet në media këtë veprim të arbitrit kryesor Klajdi Kola, por ta padisin atë edhe në prokurori.

Mësohet se me urdhër të presidentit Gjici për Kolën drejtuesit e klubit do të hartojnë një dosje me fakte pasi ai ka dëmtuar qëllimisht Kukësin dhe garën në kampionat. Ishte zyra juridike e Kukësit, që e ndihmuar nga zyrtarët e tjerë, ka mbledhur prova, pamje filmike, opinione nga njerëz të fushës se arbitrimit, ndeshje të mëparshme, madje nënkampionët do të përdorin si provë edhe një deklaratë të ish-trajnerit të tyre, Shpëtim Duro, i cili mbas një ndeshjeje sezonin e shkuar ndërmjet Kukësit e Laçit akuzonte pikërisht arbitrin Klajdi Kola duke thënë: “Sa herë që ky arbitër gjykon kur luan Laçi, kurbinasit fitojnë”.

Gjithashtu, si prova do të paraqiten edhe deklaratat dhe shkresat e mëparshme të klubit, me anë të të cilave i është kërkuar federatës që ky arbitër të mos gjykojë më Kukësin dhe se është “non grata” për klubin verilindor. Zyra juridike e Kukësit do ta denoncojë Kolën në federatë, në Ligën Profesioniste, do t’i bëjë notë proteste zyrës së arbitrave e mandej pritet të ketë dhe një kallëzim penal në Prokurorinë e Tiranës. U takon institucioneve përkatëse më pas të marrin masa në lidhje me këtë gjyqtar, i cili, sipas klubit, në mënyrë të qëllimshme ka vjedhur rezultatin e ekipit kuksian