Autoritetet gjermane i janë përgjigjur letër-porosisë së Prokurorisë së Posaçme që po zhvillon hetime për drejtuesin e lartë të Policisë, Artan Shkëmbi, në lidhje me akuzën e korrupsionit dhe nxjerrjes së sekretit hetimor.
Burime nga organi i akuzës, bëjnë me dije se përmes një letër-porosie, hetuesit gjermanë kanë sqaruar se si zbuluan se 2 të hetuarit prej tyre kishin kuptuar që ishin nën hetim.
Sipas letër porosisë, ka qenë një mesazh që nr.2 i OFL-së, i ka dërguar një personi të vënë nën hetim nga autoritetet gjermane.
Mesazhi i cili i është dërguar të hetuarve është një foto e bërë mbi një pajisje elektronike të të dhënave në sistemin Deep see.
Konkretisht, kërkesa e autoriteteve gjermane për verifikimin e pasurive apo verifikime të tjera të nevojshme për hetimet e nisura ndaj shtetasve me inicialet K.V., dhe A.P., i është dërguar të hetuarit me inicialet K.V. Pak ditë më parë, Gjykata e Lartë rrëzoi kërkesën e Shkëmbit për tu rikthyer në detyrë me argumentin se nuk ka asnjë shkelje procedurale nga gjykata e Apelit.
Zyrtari i lartë i policisë është vënë nën hetim nga Prokuroria e Posaçme pasi akuzohet për nxjerrje të sekretit hetimor dhe korrupsion.
Shkëmbi është hetuar 6 muaj më parë, me dyshimin se ka nxjerrë një informacion, i cili është kërkuar nga autoritetet gjermane për veprimtarinë e një grupi kriminal. /abcnews.al/
