Arjola Cakollari ishte 27-vjeçarja nga Berati që ndërroi jetë të martën si pasojë e koronavirusit në spitalin Covid 1 në Tiranë.
E reja jetonte në Tiranë, por kishte shkuar për t’i shërbyer prindërve, të cilët ishin infektuar më herët me koronavirus, dhe jetonin në qytetin e Beratit.
Dyshohet se ajo është infektuar gjatë këtij momenti duke u shtruar fillimisht në repartin Infektiv të spitalit të Beratit, por përkeqësimi i gjendjes shëndetësorë bëri që ta dërgonin në Tiranë ku u fut në intubim.
Fatkeqësisht, 27-vjeçarja humbi jetën disa ditë më vonë pasi virusi i kishte prekur 99% të mushkërisë duke e bërë praktikisht të pamundur që ajo të mund të kryente funksionin.
Arjola u përcoll dje për në banesën e fundit nga të afërmit, ndërsa mësohet se nuk vuante nga asnjë sëmundje tjetër shoqëruese, që të kishin ndikuar në përkeqësimin e gjendjes së saj.
Ndërkohë që nëse shohim shifrat e Ministrisë të bëra publike gjatë ditës së djeshme, rasti i të resë nga Berati nuk është raportuar, edhe pse ajo ka ndërruar jetë të martën, dhe shifrat supozohet të jenë të 24 orëve të fundit.
”Me gjithë përpjekjet e stafit mjekësor, 21 qytetarë e kanë humbur betejën me COVID19: 6 qytetarë nga Tirana, 2 qytetarë nga Elbasani, 2 qytetar nga Berati, 2 qytetar nga Kuçova, 1 qytetar nga Kavaja, 1 qytetar nga Fieri, 1 qytetar nga Kukësi, 1 qytetar nga Lushnja,
1 qytetar nga Durrësi, 1 qytetar nga Puka, 1 qytetar nga Librazhdi, 1 qytetar nga Kolonja, 1 qytetar nga Kurbini, të moshave 42-94 vjeç. Ministria e Shëndetësisë dhe Mbrojtjes Sociale i shpreh ngushëllime familjarëve të të ndjerëve”, njoftonte zyrtarisht gjatë ditës së djeshme Ministria e Shëndetësisë.
Nuk dihet nëse asaj i është bërë tamponi, pasi në Tiranë dhe rrethe prej kohësh ka vonesa në përgjigje, që jo në pak raste sjell rëndimin e gjendjes së pacientëve.
