Erdhi vera! Vilat e Qeveritarëve po shpenzojnë 20 mijë euro për impiante për filtrim uji

Nje prej vilave qeveritare ne jug te vendit

Nga Boldnews.al

Një nga të mirat e pushtetit është se pushon kudo në Shqipëri. Madje, falas! Të gjitha shpenzimet mbulohen me paratë e taksave tona. Që nga ndërtimi i vilave, mirëmbajtja, rrogat e punëtorëve, mobilimi, ushqimi e madje edhe orenditë luksoze që gjenden me shumicë në këto vila. Gjatë 8 viteve në pushtet, Rilindja i ka shfrytëzuar në maksimum këto shtëpi pushimi, duke i rregulluar dhe mobiluar në mënyrë tepër bashkëkohore. Madje, duke blerë orendi elektroshtëpiake shumë cilësore.

Duke kopjuar “atin shpirtëror” (Enver Hoxhën), krerët aktual të shtetit kalojnë shumicën e verës në shtëpitë e pushimit. Ndryshe nga shumica e shqiptarëve që tërmeti dhe pandemia i ka bërë “me dhimbje koke”, ku kanë harxhuar edhe kursimet e fundit për shëndetin dhe pronën, zyrtarët vijojnë të bëjnë shpenzime luksi. BoldNews denoncoi pak javë më parë se Drejtoria e Shërbimeve Qeveritare shpenzoi dhjetëra mijëra euro për TV apo edhe shtrydhëse frutash. Ndërkohë, aktualisht e njëjta drejtori po shpenzon 20 mijë euro të tjera për të blerë impiante për filtrim uji!

Mbi 80 përqind e Shqipërisë, përjashto Pogradecin dhe Korçën si dhe disa fshatra, nuk kanë ujë të pijshëm në çesmat e shtëpisë. Megjithëse janë shpenzuar dhe po shpenzohen miliarda lekë në Ujësjellësa, sërish uji që vjen në rubinetat e shtëpisë nuk është i pastër, jo më që të konsumohet për të pirë. Vendosja dhe mirëmbajtja e impianteve të filtrimit janë kosto të papërballueshme për secilin taksapagues. Por, këta të fundit po paguajnë që shtetarët të kenë ujë të pijshëm në Vilat Qeveritare. Sipas dokumenteve që disponon BoldNews, Drejtoria e Shërbimeve Qeveritare ka hapur tenderin me objekt “impiantë për filtrim uji”, me fond 1.984.683 lekë pa TVSH. Me TVSH rrëth 20 mijë euro. Kohëzgjatja e kontratës është vetëm 10 ditë. Pra, shtetarët po i kërkojnë në mënyrë urgjente këto impiante.

LEXO EDHE  Apeli i Yuri Kim: KLP t’i rezistojë presionit dhe të na sigurojë drejtësi

Bashkëlidhur tenderit, ka edhe një listë të gjatë se çfarë kërkojnë këto vila. Kërkohen 3 copë filtër sediment “big blue”, trajtues uji të avancuar etj, etj. Ajo që të bën përshtypje në listën e tenderit është se kërkohen materiale cilësore. Disa javë më parë BoldNeës publikoi dokumentet e një tjetër tenderi të kësaj drejtorie, ku u blenë disa televizorë, fshesa me korent apo edhe shtrydhëse frutash.