Halim Kosova, ish-ministër i Shëndetësisë dhe ish-deputet i PD, duke folur për situatën e pandemisë në vend, tha se situata duhej të menaxhohej nga epidemiologët.
Kosova tha se është gati të marrë Kryeministrin në telefon dhe t´i kërkojë që të marrë situatën në dorë dhe do t´a zgjidhte për dy javë.
“Nëse Rama do të më linte në dorë situatën, e cila është shumë e vështirë, do e zgjidhja për dy javë. Ministria e Shëndetësisë le të vendosë numra telefoni në dispozicion të të sëmurëve me diabet apo sëmundje të tjera, që preken nga Covid, duke iu afruar qetësinë për pikëpyetjet që janë.
Jam i prerë për masa shumë shtrënguese, por Qeveria mendon se ka zgjedhjet përpara dhe do të shkaktonte një krizë ekonomike para zgjedhjeve që do të ndikonin në rezultat”, tha dr. Kosova në studion e emisionit Open. Sipas tij, janë shumë resurse njerëzore apo teknologjike të jenë përdorur.
Ai shtoi se sa më shumë të rrokulliset kjo situatë pa masa drastike, aq më e zgjatur do të jetë kjo situatë.
“Duhen masa të prera për dy javë, dhe do të shikoni se situata do të ndryshojë. Situata shëndetësore nuk ndërtohet në kohë pandemie, por që kur je fëmijë”, tha Kosova.
