Partizani nuk shkoi më shumë se barazimi 1-1 me Laçin. Të kuqtë janë të dytët në kampionat, me 38 pikë. Presidenti i kryeqytetasve, Gaz Demi dha pak më parë një intervistë për Supersport, ku foli për 90 minutëshin e sotëm, por jo vetëm.
“Iku ai momenti i 3 pikëve. Donim t’iu merrnim por s’i morëm. Jeta vazhdon. Bashkëpunim me Veronën? E pamundur të bësh bashkëpunim me shqiptar. Kam vite që kontribuoj te Partizani. Bashkëpunim mund të bëj edhe me Chelsean. Unë bëj tifo me Interin. Apolonia më ka mbetur shumë peng. Ata e merituan dhe pengu ikën kollaj. Për të qenë korrekt, sot u meritua barazimi. Të dy ekipet patën nivel të lartë. Na iku mundësia e shkëputjes nga Laçi.
Doli diçka nga politika e ca të tjerë që s’dua të përmend emra që folën për Partizanin. Investimi thuajse ka mbaruar. Janë ca burokracira dhe magazina, që s’i kuptoj. Partizani duhej të dilte në fushën e vet që këtë vit. Të mos bëjmë shpenzime të mëdha. Të shikojmë me këtë ministrin e ri me Peleshin. Drejtorët e mi do të ikin të hënën të takohen. Është e sigurt që këtë muaj Partizani del në fushë nëse mbyllet marrëveshja me ministrinë. Kompleksi ende s’ka përfunduar, por fusha është gati. Është i vetmi klub, që s’ka asnjë mbështetje.
Jam taksapagues i madh për sportin te Rilindja. Pa shtëpi, s’kemi si t’i edukojmë fëmijët. Është bërë një investim që qeveria, politika duhej të dilnin dhe t’u puthnin dorën drejtuesve të Partizanit. Është bërë një ambient për brezat e ri. E kam bërë, erdhi dhe federata dhe pa fushën. Kemi folur këto vite për Skënderbeun. Bashkia e Korçës gjithmonë e ka mbështetur. Tirana merr bakshish nga bashkia kur fiton titullin, ne jo, që punojmë vetëm me krahët. Partizani nuk është i Gaz Demit, po i të gjithëve.
Ilir Daja është blerja më e mirë e vitit falë drejtorit. Me Ilirin shpresoj të dal në pension. Është një burrë fisnik. Shpresojmë të bëjmë një Partizan të madh. Po nuk u bë akademia jonë dhe fusha jonë, nuk them dot asnjë gjë. Gjithçka mbeten barcaleta. Nuk ka asnjë lidhje titulli këtë vit me Dajën, nuk asnjë presion ndaj tij, edhe pse jemi në rrugë të mbarë. Kemi një marrëveshje xhentëlmenësh që të shkojmë larg e më larg, Ju e dini si e nisëm këtë vit” – tha ai.
