Hap fals në Verona/ CR7 nuk mjafton, Juventusi abonohet me barazime

Tjetër barazim për Juventusin në Serie A, i shtati sezonal. Bardhezinjtë nuk morën më shumë se një pikë nga transferta në Verona kundër Hellasit vendas, sfidë që përfundoi 1-1.

Pjesa e parë nuk prodhoi gola, teksa e dyta nisi me rrjetën e kampionëve në fuqi. Federico Chiesa dhuroi një asist për Cristiano Ronaldon në minutën e 49-të dhe ylli portugez dërgoi topin në rrjetë (19 gola këtë sezon në Serie A).

LEXO EDHE  Tifozët deklaratë kundër Superligës, nismës i bashkohen edhe TKZ

Vendasit nuk u dorëzuan dhe gjetën golin e barazimit në minutën e 77-të. Kros i Lazovic nga krahu i majtë dhe finalizim me kokë i Antonin Barak. Mesfushori çek fitoi duelin me mbrojtësin kundërshtar dhe i dhuroi një pikë Hellasit.

Barazimi i sotëm e ka ngjitur Juventusin në kuotën e 46 pikëve. Distanca me Interin e vendit të parë është shtatë pikë. Hellas Verona renditet në vend të nëntë me 35 pikë.