Dy bulldogët francezë që iu vodhën këngbtares së famshme, Lady Gaga, janë gjetur të sigurtë dhe janë dorëzuar në polici, sipas zyrtarëve. Të dy qentë, të vjedhur në një grabitje të armatosur, janë “bashkuar” me përfaqësuesit e këngëtares, tha policia amerikane.
Shëtitësi i qenve të Lady Gaga, Ryan Fischer, u qëllua nga dy burra që rrëmbyen qentë në Hollywood, Los Angeles, të mërkurën. Ai është në spital dhe familja e tij tha të premten se ai pritej të shërohej plotësisht.
Detajet sesi u gjetën qentë janë të paqarta. Associated Press tha se një grua i kishte sjellë në rajonin policor të Komunitetit Olimpik në Los Angeles dhe përfaqësuesit e këngëtares kishin konfirmuar se ishin qentë e saj. Gruaja dukej se ishte “e papërfshirë dhe e palidhur” me grabitjen, tha një zëdhënës i policisë.
Lady Gaga kishte ofruar 500,000 dollarë (359,000 stërlina) për kthimin e qenve në mënyrë të sigurtë, por nuk është e qartë nëse shpërblimi është kërkuar nga gruaja që i ktheu.
