Shqipëria vijon të regjistrojë shifra të larta të të prekurve me koronavirus, ku pothuajse 25-30 % e testimeve të realizuara rezultojnë pozitive.
E ndërsa prej disa ditësh janë hapur pavionët Covid në disa prej spitaleve rajonale, duke ulur fluksin e shtrimeve nga qytetet e tjera në spitalet Covid në Tiranë, ka një përhapje të koronavirusit te moshat e reja.
Gjendja në dy pavionet Covid në spitalet rajonale në Durrës dhe Elbasan paraqitet më e qetë se pak ditë më parë. Numri i të shtruarve në Durrë është 65 nga 87 që ishte disa ditë më parë. Ndërsa në Elbasan rezultojnë të shtruar vetëm 13 pacientë, edhe pse shifrat e infektimeve vijojnë të larta.
Gjatë kësaj jave, në Elbasan, mes të infektuarve kanë qenë edhe 20 nxënës dhe 39 mësues. Ndërkohë në gjimnazin “Ahmet Dakli” një klasë është e karantinuar e gjitha pasi 3 prej nxënësve kanë rezultuar pozitivë me Covid-19.
Në Elbasan numri i rasteve aktive rezulton zyrtarisht 924 persona, ndërsa në Durrës 1721 persona.
