Tek Atalanta nuk kanë rënë nervat ndaj Tobias Stieler, arbitrit që gjykoi ndeshjen e së mërkurës ndaj Real Madrid në Champions, dueli i parë i raundit të 1/8 në kompeticionit më të rëndësishëm për klube.
Gjermani ndëshkoi Remo Freuler me karton të kuq në minutën e 17-të, teksa djemtë e Zidane fituan në fund me rezultatin 0-1. Presidenti i klubit italian, Antonio Percassi nuk është përmbajtur aspak në prononcimin e dhënë për GDS.
“Tronditje e madhe, m’u dridh i gjithë trupi. Është absurde të shkatërrosh në atë mënyrë një ndeshje të tillë. Mendova me veten: nuk është e vërtetë, me siguri që u ngatërrua te ngjyra e kartonit…
Një gjë m’u ngulit në tru gjatë ndëshkimit të Freuler: frika. U stërfavorizua skuadra më e rëndësishme dhe ajo me më shumë histori. Mëkat, 11 kundër 11 do të ishte një tjetër ndeshje, një ndeshje shumë e bukur“, thekson Percassi.
