Mjekët apel Qeverisë: Të mbyllen për 1 muaj shkollat, transporti publik dhe lokalet

Shqipëria është në situatën më kritike nga pandemia e Covid-19. Përhapja e koronavirusit dhe humbjet e jetëve janë në nivele alarmante.

Mjekët i bëjnë thirrje qeverisë të marrë masa urgjente duke mbyllur shkollat, lokalet dhe transportin publik, për të paktën 3-4 javë.

Kirurgia Lida Shosha thekson nevojën për mbylljen e disa shërbimeve dhe fundjavat karantinë. Sipas saj, spitalet janë tejmbushur ndërsa mjekët janë të lodhur dhe të mbingarkuar.

Për infeksionistin Arben Pilaca, politika nuk duhet të mendojë për zgjedhjet në prill, por për jetën e qytetarëve në këtë periudhë të vështirë.

LEXO EDHE  SHBA shton Shqipërinë në listën e 116 vendeve ku këshillon të 'mos udhëtohet'

Komiteti Teknik vendosi të mos ashpërsojë masat duke lënë në fuqi kufizimet ekzistuese. Ekspertët deklaruan se ka një tendencë në rënie të infektimeve por shifrat zyrtare dhe humbjet e jetës po shënojnë çdo ditë rekorde të reja.

Deri tani kanë humbur jetën mbi 1700 qytetarë të moshave të ndryshme, ndërsa të infektuar rezultojnë mbi 100 mijë persona në të gjithë vendin. /A2news/