Gazment Bardhi, Sekretar i Përgjithshëm i PD dhe Drejtues Politik për qarkun e Elbasanit, u shpreh sot se qytetarët blejnë me lista, ndërsa akuzoi Kryeministrin Edi Rama për dështime spektakolare në 8 vitet e pushtetit të tij.
Bardhi u shpreh se tregtarët e vegjël të ushqimoreve dhe fruta perimeve nuk shtojnë xhiron, por listat e borxheve.
Ardian Myrta i tregoi drejtuesit politik të Qarkut të Elbasanit, Gazment Bardhi, fletoret e listave, ku shënohet emri i klientëve që marrin pa para, pasi nuk kanë me çfarë jetojnë. “Konsumi ka rënë, veçanërisht gjatë pandemisë dhe nuk morëm asnje mbështetje”- tha ai. I njëjti nivel varfërie në Elbasan, duket edhe tek dyqani i Ndriçim Debrovës.
Bardhi theksoi se “e vetmja mundësi për të dalë nga kjo krizë është ndryshimi më 25 prill”.
Sipas tij, Qeveria e PD do të rrisë ndihmën ekonomike, pensionet dhe do të bëjë të mundur që qytetarët të kenë më shumë të ardhura, për të rritur kështu konsumin dhe mirëqënien e tyre.
“Kudo banorët shprehen për nevojën për ndryshim dhe se kështu nuk mund te ecet më. Unë siguroj këdo që PD nuk ka premtime elektorale, por angazhime konkrete të studiuara mirë që do të përmirësojnë menjëherë jetën e njerëzve”, u shpreh Gazment Bardhi.
