Kalorësi anti-korrupsion, Dvorani e meriton vaksinën e Covid-it

Shqipëria, prej të martës së kësaj jave, e meriton të ndihet krenare, më shumë se kurrë në jetën e saj të gjatë.

Nga gjiri i saj ka dalë një kalorës i luftës kundër korrupsionit.

Ardian Dvorani është nderuar me titullin e lartë nga vetë Departamenti i Shtetit, i cili, nëpërmjet ambasadave të saj në mbarë globin, ka qëmtuar në listën e vendeve periferike të botës personalitetet që kanë dhënë kontribut të vyer në luftën kundër korrupsionit.

Në Shqipëri, nuk ka asnjë zog nëne të tregojë se cili është kontributi i Dvoranit në luftën kundër korrupsionit.

Gjithçka dihet për të është që ka dënuar të rinj në vitin 1990, për krimin e rëndë politik, atë të rrëzimit të bustit të Stalinit.

Dihet që mandati i tij 9-vjeçar si anëtar i Gjykatës së Lartë përfundoi pas 15 vitesh.

Dihet që Dvoranit i mungonin 100 milionë lekë (rreth 100 mijë dollarë) në deklaratat e pasurisë dhe megjithatë e kaloi Vetingu-n pa problem.

LEXO EDHE  Eksploziv për herë të tretë, shpërthim në oborrin e banesës së Arben Pëllumbit

Dihet edhe që, me metodat e tij në krye të Këshillit të Emërimeve në Drejtësi, Ardian Dvorani shpiku modelin e “betimit tek noteri” të anëtarëve të Gjykatës Kushtetuese.

Dihet edhe që Komisioni i Venecias e konsideroi si përgjegjësin kryesor për krizën institucionale që përfshiu shtetin, pas manovrave për t’i dorëzuar plotësisht Gjykatën Kushtetuese në duart e kryeministrit Edi Rama.

Për të gjitha këto, Ardian Dvorani jo vetëm e meriton një dekoratë “ambasadoriale”, por, mbi të gjitha, e meriton një vaksinë anti-Covid në listën prioritare.

Kryeministri Rama ka deklaruar se, të parët që do të vaksinohen për flamën globale, janë personalitetet mbi moshën 80 vjeç.

Ardian Dvorani nuk plotëson kushtin e moshës. Por, ai e plotëson dhe tejkalon këtë “mungesë proceduriale” me dekoratën që mori nga Departamenti i Shtetit.

Shqipëria, një vend i zhytur në korrupsion, tashmë ka një kalorës të mirëfilltë anti-korrupsion.

Ai e meriton një vaksinim të shpejtë.