Skënder Brataj, kreu i Urgjencës Kombëtare, tha sot se aktualisht jemi në gjendjen plate të pandemisë së Covid-19. Sipas tij, prej 3 ditësh kemi një stabilizim të kurbës, pra jemi në atë që quhet kurba e sheshtë dhe shpresoj që brenda disa ditësh, kjo kurbë të nisë uljen.
“Jemi në një situatë të stabilizuar, pasi nuk ka rritje rastesh. Jemi në zonën plate, do të presim edhe 2-3 ditë për të vendosur lidhur me masat që do të aplikohen”, tha Brataj.
Në studion e News 24, ai tha se nuk përjashtohet asnjë masë kufizuese, që nga transporti publik dhe deri te mbyllja e bareve dhe restoranteve duke lejuar vetëm shërbimin e shpërndarjes 24 orësh të ushqimeve.
“Nuk mund të kemi lehtësim masash në kushtet aktuale, për shkak të rasteve. Këto dy muaj ne duhet të jemi më të kujdesshëm”, tha Brataj.
Sipas tij, gjithçka do të vendoset bazuar në të dhënat që do të kemi edhe nga ISHP, situata në spitale, numri i të infektuarve për 100 mijë banorë si dhe numrin e vdekjeve.
“Asgjë nuk përjashtohet, qoftë ulja e orës policore, ashtu edhe mbyllja e disa shërbimeve që mund të vlerësohen se ndikojnë në rritjen e rasteve”, tha Brataj, duke mos përjashtuar as mbylljen e shkollave.
