Policia ka zbardhur sulmin me sende të forta që iu bë një të riu në një lokal në Fushë Krujë, ngjarje e ndodhur më 17 shkurt.
Ngjarja u denoncua në media, ndërsa në videon e publikuar shfaqeshin 4 persona të armatosur që hynë në një lokal dhe goditën me shkopa bejsbolli një 30-vjeçar.
Lidhur me sulmin ndaj të riut, në kërkim është shpallur autori i dyshuar 34-vjeçari Gazment Kusta, banues në Budull, Krujë, i dënuar më parë jashtë vendit, për trafikimin të lëndëve narkotike.
Dyshohet se Kusta, më 17 shkurt u fut me disa persona të tjerë në ambientin e një lokali në Fushë Krujë dhe goditi me sende të forta në kokë 30-vjeçarin E. E.
I riu pasi mori ndihmë mjekësore, u largua për në banesë.
Po ashtu, në vijim të hetimeve është ndaluar 31-vjeçari Geart Bakalli pasi akuzohet që ka penguar zbulimin e së vërtetës. Gjatë kontrolleve të ushtruar në banesën e tij, policia gjeti disa veshje të përdorura nga autorët dhe 1 mjet tip “Audi”, të cilin dyshohet se autorët e kanë përdor për t’u larguar.
