Kryeministri Edi Rama, u shpreh se krahas personaliteteve do të vaksinohen edhe të moshuar të tjerë të sugjeruar nga mjeku i familjes.
Rama u shpreh se personat e vaksinuar kanë dhënë një kontribut për këtë vend dhe duhet të tregojmë mirënjohje sa janë gjallë dhe jo të mbajmë fjalime dhe vlerësime pas vdekjes së tyre siç bëhet në Presidencë.
“Nuk bëhet fjalë për personalitetet jashtë kësaj kategorie, por bëhet fjalë për të filluar vaksinimin e 80 vjeçarëve me disa personalitete që janë 80 vjeçarë e për të dhënë një mesazh solidariteti me ta, përkujdesje për ta sepse e vë re dhe me një faraë sëkëlldie që kur këta njerëz ndahen nga jeta, ka një moment lot derdhjeje dhe një moment rrjedhjeje fjalësh dhe fjalimesh për ta, që nuk ma ha mendja se do të dukeshin më bukur nëse ne do duhej të përballeshim larg qoftë me humbjen e ndonjërit prej tyre për shkak të mungesës së vaksinës dhe nga ana tjetër, edhe për të shfrytëzuar pozitivisht imazhin dhe influencën e tyre tek njerëzit në kushtet kur vaksinimi është një fushatë kudo.
Pra, fillojmë me kategorinë e 80 vjeçarëve dhe të parët, faktikisht nuk janë as të parët me diferencë, janë të parët në një ditë të parë ku do të vaksinohen dhe të tjerë që janë njerëz të zakonshëm, por fillon me këta, në mënyrë simbolike, në mënyrë si të thuash shembullore për të vazhduar me të tjerët.
Është bërë një reagim shumë i padenjë, shumë mizerabël do të thoja lidhur me këtë nga njerëz që kanë mundësinë të komunikojnë me publikun e që e shpërdorojnë rëndom këtë mundësi duke u përpjekur që edhe këtë rast ta shfrytëzojnë për të shfryrë mllefin e tyre ndaj qeverisë, ndaj meje, por kjo nuk është e denjë mendoj unë.
Është një shenjë përkujdesje për këta njerëz, pasi nuk duhet të presim që të ndërrojnë jetë dhe më pas të mbajmë fjalime dhe dekorime siç bëhet në presidencë.
Nuk do të zbritet më poshtë pa përfunduar kjo kategori e moshës. Do të fillojmë me më të moshuarit dhe pastaj për të gjitha kategoritë me radhë. Do të përfundojmë vaksinimin e plotë të mjekëve dhe infermierëve dhe më pas do të bëjmë çdo gjë për të siguruar dhe dozat e tjera. Jemi besimplotë që do të arrijmë ambicien tonë të vaksinimit të plotë të popullsisë në 14 muaj”,tha Rama.
