Nga Boldnews.al
Pas shtatë vitësh e gjysmë pushtet, Rama po i bien kryq e tërthor vendit për të kërkuar një mandat të tretë, por edhe vetë e ka kuptuar se nuk gjen më në masë të rinj, as familje të reja, sepse i ka detyruar të ikin në emigrim, shumica në kërkim të azilit.
Për Ramën janë thjesht disa shifra, madje duket një strategji e mirëmënduar për të zbrazur vendin pikërisht me kategorinë më vitale të shoqërisë që është e aftë për punë, por edhe në kërkesa.
Nga varfëria, mungesa e konkurencës së ndershme, korrupsioni në çdo hallkë të pushtetit dhe administratës publike, papunësia dhe mbi të gjitha arroganca qeverisëse, janë detyruar të ikin, duke mos parë më asnjë fije shpresë. Tashmë Rama kërkon vota dhe këtë largim masiv e quan si një “trend botëror”, madje arrin deri në fyerje duke e konsideruar si “shkëmbim kulturash” qëndrimin në kampet e azilit të mijëra emigrantëve shqiptarë.
Ikin të rinj, madje edhe familje me fëmijë të mitur dhe ngjeshen ne çadra dhe kapanone ku bashkë me ta ndodhen edhe emigrantët e luftës nga Siria, Afganistani apo Afrika. Qëndrojnë me shpresën se do të pajisen me leje qëndrimi dhe kërkojnë azil ekonomik. Shpesh u është refuzuar dhe kryesisht të rinjtë ikin duke qëndruar ilegalisht dhe bërë një jetesë mizarabël, pa strehë mbi kokë, pa të ardhura dhe gjithnjë me frikën se do i deportojnë në Shqipëri, aty ku
nuk duan të kthehen më, pikërisht mbi padrejtësinë e madhe që kanë lënë këtu.
Por kryeministri ynë ka një tjetër “këndvështrim” mbi këto largime masive, duke kapërcyer kufirimin e malinjitetit dhe përbuzjes për atë shtresë të shoqërisë që u largua dhe po largohet gjithnjë e më shumë çdo ditë.
“Sot jetojmë në një kohë tjetër. Skandaloze këtu është propaganda që bëhet se ikën 500 mijë vetë kur erdhi Rama. Këto janë çmenduri. Mos harrojmë që ka shumë shqiptarë që janë kthyer në këto periudha. Vajtja jashtë është eksperiencë, shkëmbim kulturash, Nuk është fundi i botës. Trendi historik do kthehet, por këtë nuk e vendos dot unë. Po ata që lëvizin nga Kroacia, Bullgaria e Rumania? Nuk i regjistron kund njeri si azilantë se ata lëvizin në një treg të përbashkët”-tha Rama.
Është “shkëmbim kulturash” qëndrimi në kampet e azilit për kreun e qeverisë. Merret “kultura” nga emigrantë fatkeqë të luftës, ku mes tyre janë edhe individë që vinin nga bota e errët e ISIS. Nga ana tjetër, Rama kërkon të mbulojë këtë fenomen nga më të rëndët në vend duke u justifikuar se ikin edhe në Rumani, Kroaci apo Bullgari.
Po, të dhënat e EUROSTAT tregojnë se ka emigrim edhe nga këto vende, por ata ikin për punë me dokumenta të rregullta dhe pa asnjë pengesë në lëvizjet e tyre, sepse që të treja shtetet që përmend kreu i qeverisë janë pjesë e Bashkimit Europian.
Ndërsa shtetasit shqiptarë, Europën si process integrimi, po e shohin gjithnjë e më larg, madje edhe kushtet për qeverinë shqiptare janë shtuar nga 3 në 16 kritere, ku përfshihen edhe zgjedhjet e lira dhe ndershme dhe mbi të gjitha dënimin e krimit elektoral për tu hapur negociatat me BE-në. Paradoksalisht, Rama e bëri këtë deklaratë për emigrimin në krah të Damian Gjiknurit, ish-ministrit dhe kanakarit të përjetshëm të tij i cili u kap në përgjime duke folur për ndikim në zgjedhje me “çuna problematic” apo kontakte me botën e krimit të cilin e zbarkoi në Dibër në zgjedhjet e pakohëshme lokale të vitit 2016.
Ai as nuk është proceduar, jo më të ketë shpresë se do të përgjigjet për fenomenin e rëndë të shitblerjes së votave. Përkundrazi, Damiani thjsht ka zhvendosur “vvunat problematic” duke i mbledhur aty në Vlorë ndërsa mban edhe drejtimin politik të PS-së në këtë qark.
Damiani i tij nuk e ka provuar azilin, as Beni dhe Beli që të fundit udhëtim që kanë jashtë vendit e regjistruan pak javë më parë në Dubai, ndërsa hanin darkën e shtrenjtë me biftekët e artë të Nusretit. Pikërisht prej tyre Rama mund të ketë marrë indicin se emigrimi sjell shkëmbim kulturash. Beni dhe Beli, dy ministrat e tij i kanë rrëfyer se kultura e konsumit të biftekëve të artë, apo luksi në Dubain e sheikëve, është një “kulturë” që i shkon kupolës së pushtetit, por jo azilantit fatkeq që sot edhe fyhet!
