Dy vjet më parë, Kryeministri Edi Rama i ka dhënë italianit Carlo, përmes një vendimi qeverie disa prona me qira me 1 euro.
Në vendimin që tashmë dihet pasi është botuar prej kohësh thuhet ‘dhënien e miratimit për lidhjen e kontratës së qirasë me tarifën 1 euro/kontrata, ndërmjet Ministrisë së Financave dhe Ekonomisë, si qiradhënës, dhe shoqërisë ‘MTSC’ sh.p.k., si qiramarrës, për pasurinë shtetërore ‘Ish-ndërmarrje metalike ‘Tirana’’ (Reparti i orëve), prona nr. 19, me numër pasurie 7/649, me sipërfaqe të përgjithshme 4021.50 m², nga të cilat sipërfaqe ndërtimore 1624.44 m2, dhe sipërfaqe funksionale 2397.06 m2, zona kadastrale 8220, në përgjegjësi administrimi të Ndërmarrjes Industriale nr. 1, Tiranë, për një periudhë 20 (njëzet) vjet, sipas genplanit dhe tekstit të projektkontratës’.
Prona në fjalë iu dha italianit, ndërkohë që në të njëjtin vend ishte programuar ndërtimi i një shkolle. Por përpara shkollës si prioritet, ishte Carlo, i njohur për suportin dhe mbështetjen e pakursyer ndaj Kreministrit rilindas, që në anën tjetër nuk mund të linte pa e “shpërblyer” përkushtimin me një pronë.
Loja vazhdon, Carlo bëhet pronar i një prone pa pasur asnjë letër dhe më pas se ka problem që të sulmojë çdo pronar që mund të ketë letra dhe të pretendojë zhvillimin e pronës së tij.
Por kjo duket se është jashtë konceptit të italianit, pasi që të quhesh pronar, nuk duhet të kesh letra mbi pronësinë, as të jesh trashgimtar i pronarëve, por duhet të kesh mik Kryeministrin, t´i shërbesh, që ai përmes VKM-ve të të bëjë pronar.
Vetëm në këtë rast mund të quhesh “pronar” i vërtetë. Për këto lloje pronarësh nuk ka rëndësi as ligji, as procesi, thjesht mjafton një letër që e firmos beu, i cili fal pronat, qofshin edhe ato publike, duke i caktuar edhe çmimin 1 euro, duke i caktuar edhe kohën e shfrytëzimit, madje duke shkelur edhe mbi interesin e komunitetit.
E çfarë vlere do të kishte nëse në pronën që iu dhurua italianit do të ndërtohej një shkollë, kopësht apo çerdhe? Për komunitetit do të kishte shumë vlerë, për Kryeministrin dhe italianin nuk kanë asnjë vlerë. E rëndësishme është që italiani Carlo të bëhet pronar pa pasur asnjë letër.
