Kryeministri Edi Rama e ka kthyer procesin e vaksinimit në një show, duke bërë propogandë, ndërsa vaksinat që duhej të kishin mbërritur në javën e tretë të janarit, sikundër deklaronte Kryeministri kanë ardhur në mes të shkurtit.
Nga dita e sotme procesi i vaksinimit, përveç Tiranës shtrihet edhe në Vlorë dhe Shkodër, ku sërisht janë zgjedhur si mjedise ambientet sportive.
Në Tiranë qendra e vaksinimit u ngrit në Air Albania, ndërsa në Shkodër është zgjedhur Pallati i Sportit “Qzim Dervishi”.
Por ajo që tërheq vëmendjen është fakti se procesi i vaksinimit nuk nis pa qenë prezent Edi Rama, i cili pritet të mbërrijë në kryeqendrën e veriut në orën 09:00.
Ashtu si edhe në Tiranë, kur vaksinimi nisi vetëm kur Rama u shfaq në stadium, edhe në Shkodër po përdoret e njëjta skemë, a thua se Kryeministri do të “bekojë” procesin.
Mësohet se në këtë fazë të parë do të jenë në total 1100 vaksina nga 7020 që kanë mbërritur në Shqipëri, të cilat janë dedikuar fillimisht për personelin mjekësor.
Burime bëjnë me dije se fillimisht në spitalin e Shkodrës do të vaksinohen të gjithë ata punonjës që punojnë në repartet e infektivit, pneumologjisë, infektivit dhe urgjencës si të gjithë nga repartat e tjera që janë mbi moshën 55 vjeç.
Po ashtu edhe të gjithë punonjësit e tjerë të shëndetësisë që janë mbi 55 vjeç në Shkodër do të vaksinohen duke qenë se janë me risk më të lartë infektimi. Ndërkohë sipas burimeve edhe stafi dhe personat rezident në shtëpinë e të moshuarve do të vaksinohen gjatë ditës së nesërme në Shkodër.
Pallati i sportit “Qazim Dervishi” të paktën për 10 ditë do të shërbejë për kryerjen e vaksinimit në fushatën “Shqipëria Buzëqesh”.
Edhe në qytetin e Vlorës nis sot vaksinimi i parë, i cili do të kryhet në ambientet e pallatit të Sportit dhe do të nisë me bluzat e bardha për të gjithë jugun. Janë 1500 vaksina që kanë mbërritur në Vlorë. Prezentë pritet të jetë edhe ministrja e Shëndetësisë.
