Nga më jepni ‘tepsinë dhe timonin’ në fillim të mandatit të dytë, kryeministri Edi Rama kaloi tek: Mandatin e tretë e dua për Shqipërinë.
Kjo është tamam si ajo barcaleta me policë që tregohet nëpër Shqipëri: Jepi edhe një shans.
‘Një ditë ministri inspekton komisariatin dhe teston komisarin duke e pyetur sa bëjnë 8+2, 7 tha komisari, e ndërkohë nga pas bërtisnin me të madhe policët: Jepi dhe një shans. Edhe kur komisari e gjeti pyetjen, sërish policët në kor bërtisnin: jepi dhe një shans’.
Tamam si kjo barcaleta Rama dhe të tijët bërtasin nëpër Shqipëri, tv e në çdo dritare mediatike se duan edhe një shans, por këtë herë për Shqipërinë, pasi 8 vite nuk ju mjaftuan, se kishin miq e shokë për tu bërë qoka.
Të gjithëve na kujtohet kur në zgjedhet e 2017-s Rama kërkonte votën për të marrë për vete të gjithë tepsinë e timon bashkë, dhe shqiptarët i besuan e ja dhanë.
Por rezultati pas këtyre 4 viteve të mandatit të dytë është edhe më skëterrë se i pari, pasi numri i shqiptarëve të larguar nga vendi vetëm ëhstë rritur, papunësia gjithashtu, çmimet po ashtu, e vetmja gjë që ëhstë ulur është mundësia për mbijesë e qytetarëve.
Nëse shqiptarët do të votonin sërish Ramën në 25 prill duke i dhënë edhe një tjetër shans, pas zgjedhjeve polici (asgjë me uniformat blu) do të ishte sovrani, dhe kryekomisar Rama do vazhdonte të dridhte çelësat edhe për 4 vite të tjera, pak rëndësi ka se asgjë nuk do të bëjë për njerëzit.
Pa program, pa ide dhe pa asnjë shenjë përulësie ndaj qytetarëve Rama kërkon mandatin e tretë, a thua vallë se në dy të parët qeverisën UFO-t në këtë vend dhe prandaj projeket e mëdha ngelën vetëm në 3D.
Në 25 prill shqiptarët do t’u drejtohen kutive të votimit për të zgjedhur, ose ndryshimin e sistemit dhe shkuarjen përpara, ose komisarin që kërkon edhe një shans. /Taulant Halili/ Boldnews.al
