Nga BoldNews.al
Këshilli i Lartë Gjyqësor ka vendosur të shtyjë për të tretën herë shqyrtimin e kërkesës së Inspektorit të Lartë të Drejtësisë për shkarkimin nga detyra të gjyqtares së Krujës, Enkeleida Hoxha.
Anëtarët e “qeverisë” së Gjyqësorit kanë pranuar kërkesën e avokatit të gjyqtares Hoxha, i cili ka kërkuar që të marrë autorizimin përkatës prej saj, për ta përfaqësuar në këtë proces administrativ, ndërkohë që magjistratja prej disa ditësh është nën “arrest me burg”, e dyshuar për korrupsion nga Prokuroria Speciale-SPAK.
Vendimi i Këshillit të Lartë Gjyqësor duket si një shtyrje e panevojshme e procesit dhe këtë la të kuptohet edhe Kryeinspektori i Drejtësisë, Artur Metani, gjatë seancës, por edhe përpara mediave në në përfundim të saj .
Metani deklaroi se Enkelejda Hoxha ka pasur të gjithë kohën e nevojshme në dispozicion për t’u njohur me aktet e inspektimit, si edhe për të zgjedhur një përfaqësues ligjor.
Inspektori i Lartë i Drejtësisë nisi verifikimet mbi gjyqtaren e Krujës pas një serie vendimesh kontraverse të saj, në bazë të të cilave u liruan disa eksponentë të njohur të botës së krimit, të dënuar më herët me burgim të përjetshëm.
Në përfundim të veprimeve verifikuese, Inspektori i Lartë i Drejtësisë kërkoi nga Këshilli i Lartë Gjyqësor shkarkimin e gjyqtares Hoxha, me argumentin e shkeljeve të rënda në kryerjen e detyrës.
Pas marrjes së kërkesës nga kryeinspektori Metani, Këshilli i Lartë Gjyqësor caktoi seancën e parë në 8 Janar 2021.
Por, kjo seancë u shty, pasi magjistratja Enkelejda Hoxha kërkoi kohë për t’u njohur me aktet në dosjen e Inspektorit të Lartë të Drejtësisë.
Seanca e radhës u përcaktua për në datën 29 janar 2021. Edhe kjo seancë u shty, pasi gjyqtarja kërkoi kohë që avokati i saj, i zgjedhur vetëm një ditë para mbledhjes së KLGJ-së, të njihej me aktet.
Në seancën e tretë në radhë, e zhvilluar të Martën e 16 Shkurtit, gjyqtarja nuk ishte e pranishme.
Prej datës 11 Shkurt, ajo gjendet e arrestuar, pas një hetimi për korrupsion të nisur nga Struktura e Posaçmë Anti-Korrupsion (SPAK).
Në mbledhjen e së Martës, avokati i Enkeleida Hoxha kërkoi nga Këshilli i Lartë Gjyqësor pezullimin e procesit të nisur për shkarkimin e saj, me argumentin se gjyqtarja kishte nevojë për më shumë për të mbledhur dokumentacionin që do t’i shërbejë për mbrojtjen përballë kërkesës për shkarkim.
Kryeinspektori i Drejtësisë, Artur Metani, e kundërshtoi qëndrimin e avokatit. Ai kujtoi se parimet e procesit të rregullt ligjor përfshijnë edhe mbrojtjen me avokat të zgjedhur nga palët.
Po ashtu, Metani kundërshtoi edhe kërkesën e avokatit të magjistrates për më shumë kohë për sigurimin e dokumentacionit.
Sipas kreut të ILD-së, hetimi administrativ për magjistraten Hoxha ka nisur në Korrik 2020 dhe ajo është njohur me dokumentat në dosjen e inspektimit, si edhe ka pasur të gjithë mundësitë për të përgatitur mbrojtjen e saj.
Këshilli i Lartë Gjyqësor, pas këtyre qëndrimeve, vendosi të shtyjë sërish seancën, duke caktuar mbledhjen e radhës për në datën 25 Shkurt 2021, me argumentin që magjistratja duhet të saktësojë vullnetin për të qenë në seancë.
Ndërsa, sa i takon kërkesave të tjera të paraqitura nga avokati i magjistrates Enkeleida Hoxha, KLGJ vendosi që t’i diskutojë pas paraqitjes së argumentave të mbrojtjes.
