Nga BoldNews.al
Acari i ditëve të fundit në Tiranë dhe në të gjithë Shqipërinë ishte një situatë e parashikuar, të paktën rreth dy javë më parë.
Por, qeveria dhe institucionet lokale të drejtuara një shumicë thuajse absolute nga “Rilindja”, u kapën u tërësisht të papërgatitura, duke sjellë bllokim në të gjitha akset rrugore në Veri dhe në Jug të Shqipërisë.
Tërësisht e papërgatitur është shfaqur edhe Bashkia e Tiranës, e cila duket se nuk ka marrë asnjë masë paraprake për përballimin e sfidave që pasojnë temperaturat e ulta.
Shembull konkret është një tender i shpallur këtë të Hënë nga Drejtoria e Përgjithshme e Rrugëve dhe Ndriçimit Publik Tiranë (ish-Ndërmarrja nr.2), e cila ka shpallur një tender urgjent për blerje kripe industriale.
Tenderi është hapur dy ditë pasi Tirana, ashtu si pjesa tjetër e vendit, u përfshi nga i ftohti i acartë, i cili në fakt nuk ishte i papritur as për qytetarët dhe as për institucionet përgjegjëse.
Por, pavarësisht se Instituti i Gjeoshkencës dhe Ujërave (IGJEUM) kishte dhënë alarmin prej dy javësh se vendi do të përfshihej nga temperatura të ulta, të shoqëruara me borë e me ngrica, Bashkia e Tiranës duket se nuk e ka parë të arsyeshme të marrë masat përgatitore.
Dhe, tashmë që qytetarët dhe përdoruesit e rrugës po hedhin pas vështirësitë e mëdha të fundjavës, vartësit e Erion Veliaj vendosin të kryejnë blerjen e kripës industriale, e cila shërben për të bërë disi të kalueshme akset rrugore.
Sipas dokumentave të tenderit, Drejtoria e Rrugëve në Bashkinë e Tiranës synon të blejë 82 ton kripë dhe kjo sasi duhet dorëzuar vetëm një ditë më pas, pra të Martën e datës 16 Shkurt 2020.
Procedura e ndjekur nga vartësit e Veliajt është ajo e “kërkesës për propozim”, e cila aplikohet në rastet e emergjencave.
Bashkia e Tiranës nuk ka vendosur fond limit për blerjen e 82 ton kripë dhe do të jetë e detyruar të pranojë çmimin më të ulët që do të sjellin operatorët, të cilët do të shprehin interes për të shitur kripën industriale.
Kjo “shifër më e ulët” mund të jetë shumë herë më e lartë se sa mund të ishte çmimi, në rast se Veliaj dhe vartësit e tij do të ishin kujtuar më herët për të zhvilluar procedura normale prokurimi publik për blerjen e një malli të domosdoshëm në periudha ngricash.
