Kreu i LDK-së, Avdullah Hoti dhe ai i AAK-së, Ramush Haradinaj, votuan në zgjedhjet që po zhvillohen në Kosovë, ndërsa deri më tani nuk raportohen probleme.
“Servetja dhe unë e kryem obligimin tone kushtetues për të votuar, ftoj të gjithë qytetarët të cilët kanë të drejtë votë të shfrytëzojnë të drejtën e tyre të dalin dhe të votojnë, sot është dita e tyre, ata sot thonë fjalën e tyre”, tha Hoti pas votimit.
Ramush Haradinaj së bashku me bashkëshorten e tij Anitën, kanë votuar në Shkollën e Mesme të Mjekësisë “Ali Sokoli”.
”E ushtruam të drejtën tonë për të votuar, i lus të gjithë qytetarët që të votojnë. Na presin shumë sfida përballja me Serbinë, situata me pandeminë, ju lutem votoni të gjithë”, ka thënë ai.
Nga raportimet mësohet se ka një fluks të madh të votuesve që në orët e para të mëngjesit në vendvotimin shkolla “Sveti Sava” në Mitrovicë të Veriut. Ende pa u bërë një orë që nga hapja e vendvotimit qytetarët janë nisur drejt kutive të votimit duke krijuar edhe radhë pritjesh. Pjesa më e madhe e votuesve janë të komunitetit serb.
Rreth 1 milion e 800 mijë veta kanë të drejtë të hedhin votën e tyre të dielën në Kosovë, ku po mbahen zgjedhjet e parakohshme parlamentare.
Një mijë e 52 kandidatë të 28 subjekteve politike të të gjitha etnive, synojnë të sigurojnë një ulëse në parlamentin 120 vendësh të Kosovës. Dhjetë nga këto vende i takojnë komunitetit serb, ndërsa dhjetë të tjera, komuniteteve tjera pakicë.
Zgjedhjet pasuan aktgjykimin e Gjykatës Kushtetuese e cila në dhjetor të vitit të kaluar shpalli të pavlefshëm votimin e qeverisë së kryeministrit Avdullah Hoti, pas kërkesës së lëvizjes Vetëvendosje për vlerësimin e ligjshmërisë së pjesëmarrjes në votim për qeverinë e udhëhequr nga Lidhja Demokratike të deputetit Etem Arifi, i cili ishte i dënuar me 1 vjet e 3 muaj heqje lirie për “mashtrim me subvencione”.
