Monika Kryemadhi, kryetare e LSI-së, i ka drejtuar një apel të rinjve që të angazhohen në politikë dhe të marrin në duart e tyre fatet e vendit.
Gjatë një takimi me të rinj dhe të reja në Korçë që votojnë për herë të parë më 25 prill, Kryemadhi tha se është e turpshme që oligarkë me 4 klasë shkollë, duke u pasuruar me paratë publike, drejtojnë jetët e qytetarëve.
“Për 3 km rrugë na është dashur 90 minuta për ta bërë, sepse ai që ka fituar tenderin e pastrimit të rrugëve, që është mik i Kryetarit të Bashkisë, të marrë paratë, dhe të mos pastrojë rrugën”, tha Kryemadhi.
Ajo tha se të rinjtë dhe të rejat duhet të angazhohen në politikë, për të drejtuar këtë vend, pasi në të kundërt fatet do të mbeten në duart e oligarkisë.
“Si në Korçë edhe në Tiranë, shikon gjëra të çuditshme. Në Tiranë, një pallat përballë ambasadës amerikane, ii ka marrë trotuarin qytetarëve, ndërsa në Korçë një prej njerëzve të Kryebashkiakut ka marrë pemët dhe i ka futur brenda ndërtimit që ka bërë. Ne duhet të punojmë për vendin, jo për njerëzit e lidhur me pushtetin, me oligarkinë, me Edi Ramën,apo këtë kryebashkiakun e Korçës”, tha Kryemadhi.
Ajo tha se sot po mbyllen shumë prej degëve të Universiteteve, ndërsa të rinjtë po mendojnë largimin nga vendi.
“Dega më e kërkuar është infermieria, e shoqërojnë edhe me një kurs të gjuhës gjermane, sepse e kanë mendjen të largohen. Ne do e mundim arrogancën e qeverisë me buzëqeshjen tonë. Nga 25 prilli na ndajnë 70 ditë, kështu që Edi Ramës po i shkurtohen ditët në qeverisjen e vendit. Po shtohet presioni i policisë, i administratës, por ne me buzëqeshjen tonë do e mundim”, tha ajo.
