Kryeministri Edi Rama ka komentuar sot rastin e mjekut kardiolog Edvin Prifti, për të cilin SPAK ka kërkuar arrest me burg, gjatë seancës së sotme.
Gjatë një takimi me qytetarë të Tiranës, kreu i qeverisë deklaroi se sistemi ka filluar të funksionojë dhe kjo do të rrisë besimin e njerëzve që të denoncojnë.
“Sistemi ka filluar të funksionojë. Bashkë me gjykatësen, u arrestua edhe një mjek, shef pavijoni që ju gjetën në shtëpi paratë e dynjasë.
Është një lajm shumë i mirë për sistemin, kjo do të rrisë besimin e njerëzve që të denoncojnë dhe faktikisht në rastin e mjekut ka pasur një denoncim, të cilin e ka përcjellë drejtori i spitalit në sistem, për të thënë shikojeni, nuk jam unë që ta provoj por shikojeni është nuk është. Kështu gjërat fillojnë dhe vijnë hap pas hapi, nuk ka shkop magjik e formula magjike, që gjërat të bëhen në kohën e nevojshme pa kohën e duhur, vullnetin, rezistencën e forcën e lidershipit dhe mbi të gjitha pa vetëdijen që nuk bëhet dot ajo që s’është bërë me vite e vite duke përsëritur të njëjtën gjë. Sa herë të përsërisësh të njëjtën gjë dhe të presësh rezultate të tjera”, tha Rama.
Në fakt ndaj mjekut Prifti nuk ishte vendosur ende ndonjë masë arresti, përveç asaj të pezullimit, edhe pse SPAK në seancën e vlerësimit të masës së sigurisë kërkoi arrest me burg.
Ndërkohë, pas kërkesës së prokurorisë për arrest me burg për mjekun kardiolog Evin Prifti, ky i fundit ka deklaruar para gjykatës se nuk ka fshehur asnjë gjë, pasi ka punuar në Itali dhe të ardhurat e tij kanë qenë shumë të mira.
Ai thotë se 220 mijë eurot janë të fituara nga çmimet ndërkombëtare.
“Kam mbaruar me medalje ari, specializim në Siena dhe La Sapienza, diplomim si specialist në kardiokirurgji. Punova në San Camilo dhe doktoraturë La Sapienza. Kam pasur te ardhura shumë të mira në Itali. 220 mijë eurot janë të fituara nga çmimet ndërkombëtare”.
Ai tha se kur është rikthyer në 2006 në Shqipëri ka rikthyer besimin te shëndetësisa, duke bërë që shqiptarët të operohen në kryeqytet. Mjeku thekson se është denoncuesi i parë i koronavirusit dhe shprehet se do të thotë gjithmonë të vërtetën.
“Jam kthyer në 2006, njerëzit operoheshin jashtë. Unë ngrita besimin, duke drejtuar kardiokirurgjinë dhe shqiptaret operohen në Tiranë. Jam denoncuesi i parë i Covidit. Gjithmonë do të them të vërtetën. S’kam fshehur asnjë gjë. Punoj privat dhe shtet. U befasova nga prokuroria që kërkoi burg. Kam operuar mijëra shqiptarë”.
