Kryetari i Partisë Demokratike, Lulzim Basha, gjatë një takimi me përfaqësues të agjencive turistike në Durrës, tha se programi i PD është një angazhim konkret për sektorin e turizmit.
“Plani ynë ka objektiva të arsyeshme dhe të realizueshme. Plani ynë është tejkalimi i krizës së thellë ku është zhytur turizmi”, tha Basha, ndërsa shpjegoi disa nga pikat e programit, ku përfshihen taksa e sheshtë 9 %, ulja e çmimit të karburanteve etj.
Sipas Bashës, synimi kryesor është që brenda 4 viteve turizmi të ketë një rritje nga 8 në 10%, si dhe një rritje të numrit të turistëve me 15 % vit pas viti.
“Kudo në botë, sektori i turizmit u ndihmua nga qeveria, ndërsa operatorët turistikë shqiptarë nuk morën asnjë ndihmë
Plani ynë është hapja e 110 mijë vende të reja pune”, tha Basha. Sipas tij, aplikimi i taksës së sheshtë është formalizim i ekonomisë.
“Besoj e keni parë nga plani ynë që ne do të bëjmë unifikimin e taksës e tatimit mbi vlerën e shtuar, të TVSH-së 6% për të gjithë operatorët turistikë. Në programin tonë 6% unifikohet TVSH-ja për të gjithë operatorët turistikë, për të gjithë operatorët turistikë për të gjithë zinxhirin, për të gjitha këto.
Dhe një nga masat që prek gjithë ekonominë por dhe ju në veçanti është inspektoriatet. Inspektoriatet do të kenë një moratorium 12 mujor deri në një reformim sipas modelit Europian.
Që do të thotë 12 muaj nuk do të ushtrojnë absolutisht asnjë nga sjelljet, pranitë terrorizuese me biznesin dhe pas kësaj me modelin europian që do ti reformojmë këto inspektoriate, ajo që duhet të prisni ju është një rezultat i ngjashëm më atë që ndodh në Europë.
7 deri në 10 % e biznesit kontrollohet sipas analizës së riskut, por nuk vijnë inspektorët nga mëngjesi deri në darkë duke shkatërruar nervat , duke shpërdoruar kohën, energjitë e sipërmarrësit në çdo fushë, e në veçanti sektorit të turizmit i cili vuan pastaj nga problem i tretë, i cili parashtrove nga fakti që sezoni këtu mbetet tmerrësisht i shkurtër për potencialin që ka vendi”, tha Basha.
