Tre të miturit që u kapën në flagrancë mbrëmjen e të mërkurës nga një patrullë e Policisë, teksa tentonin të hapnin një bankomat, janë proceduar në gjendje të lirë.
Policia bën me dije se gjatë shoqërimit të djeshëm në Komisariat, ata kanë pranuar se kanë kryer edhe të tjera grabitje.
“Nga veprimet hetimore dyshohet se këta shtetas janë autorë edhe të 6 vjedhjeve të tjera të ndodhura gjatë muajit janar dhe shkurt”, bëri me dije policia.
Sakaq, mësohet se natën që u arrestuan, ata kishin tentuar, por pa sukses të vidhnin edhe një farmaci dhe një lokal. Nga ky i fundit, ata kishin dalë vetëm me një karikues të vjedhur.
Top Channel ka publikuar edhe pamjet e kamerave të sigurisë, ku tre të miturit me kapuç dhe me maska anticovid, duket që shkojnë nga pas lokalit për të hapur një dritare e cila ishte me kangjella hekuri.
“Specialistët për Hetimin e Krimit në Komisariatin e Policisë Nr. 3 filluan procedimin në gjendje të lirë për 3 shtetasit e mitur që u kapën në flagrancë ditën e djeshme, duke tentuar të vidhnin në një bankomat. Nga veprimet hetimore dyshohet se këta shtetas janë autorë edhe të 6 vjedhjeve të tjera të ndodhura gjatë muajit janar dhe shkurt”, tha policia.
