Një parti e re për zgjedhjet e 25 Prillit

Një parti e re pritet të regjistrohet për zgjedhjet e 25 Prillit.

Bëhet fjalë për partinë “Atdheu”, pjesë e së cilës është dhe avokati Altin Goxhaj, i njohur për aktivizmin dhe qëndrimin e tij opozitar.

Këtë të Enjte, Goxhaj ka paraqitur edhe pamje teksa bashkë me anëtarë të tjerë të kësaj partie të re politike, shkojnë në Komisionin Qendror të Zgjedhjeve për të dorëzuar dokumentacionin e nevojshëm për pjesëmarrjen në zgjedhjet parlamentare.

Në video, ata shprehen besimplotë se partia e re do të marrë rezultate të mira, ndërsa kanë kërkuar nga qytetarët firmat e tyre për të siguruar pjesëmarrjen në zgjedhje.

“Votoni vlerat, mos ricikloni plehrat. Çdo ditë iu poresim në zyrat e ‘Partisë Shqiptare Atdheu’ dhe zyrat e Koalicionit Shqiptar për të firmosur, sepse pa firmat tuaja nuk pranohet regjistrimi deri më 28 Shkurt. Mos harroni, ka shumë rëndësi firma juaj. Ne e bëmë punën tonë – dorëzuam dokumentat, tani është radha juaj. Nëse nuk firmosni mjaftueshëm nuk futemi, as ju nuk do përfaqësoheni. Si doni, t’ju përfaqësojnë plehrat?! Mos i ricikloni ato, firmosni vlerat”, apeloi Goxhaj.

LEXO EDHE  Zgjedhjet e 25 prillit, apeli i Metës: Uroj të ketë sa më pak biznesmenë në Kuvend

Në video shpjegohet se dy zyrat për mbledhjen e firmave ndodhen, njëra “te kryqëzimi i Komunës së Parisit, 500 metra poshtë stadiumit ‘Dinamo’ dhe tjetra pranë dyqanit të syzeve ‘Optica’ në Rr. e Dibrës, pranë ‘Selvisë’”.