Skuadra më e mirë në botë për vitin 2020 shpallet Bayern Munich. Gjiganti gjerman e ka fituar këtë epitet pasi arriti të mposht skuadrën meksikane, Tigres në finalen e Kupës së Botës për klube.
Ekipit të Hansi Flick, i ka mjaftuar një gol të shënuar në pjesën e dytë nga ana e Pavard. Anësori fillimisht ka ngritur flamurin për të sinjalizuar një pozicion të parregullt të Lewandowskit, por më pas është analizuar gjithçka në VAR dhe goli i francezit ka rezultuar i rregullt, duke i dhënë kështu avantazhin djemve të Hansi Flick.
Gjatë gjithë takimit, Bayern e ka dominuar sfidën dhe Tigres dhe është mbrojtur mirë. Me këtë sukses Bayern Munich hyn në histori teksa ka ftuar të gjithë trofetë e mundshëm për sezonin 2019-2020, pra Bundesligën, Kupën e Gjermanisë, Superkupën e Gjermanisë, Ligën e Kampioneve, Superkupën e Evropës dhe tashmë Botërorin për klube.
Bavarezët i bashkohen kështu Barcelonës, të cilët në sezonin 2008-2009 u bënë skuadra e parë që e arritën diçka të tillë.
