Ish-Kryeministri Sali Berisha u shpreh mbrëmjen e sotme në Opinion se gjatë ditëve të fundit kanë vdekur 43 persona, nga 33 që u regjistruan në mars, prill dhe maj të 2020.
Berisha tha se në një situatë të tillë duhet të mbyllen urgjentisht shkollat, që nuk kanë asnjë masv higjenike.
“Edi Rama përdori strategjinë e terrorit, ajo strategji çoi në vetëvrasjen e të sëmurëve me Covid-19. Shkollat janë kthyer në bomba biologjike. E dini ju sa vetë janë sot nëpër shtëpi me Covid që kurohen? E kthyen Shqipërinë në një spital të madh. Pse nuk shtrohen njerëzit në spitale? Sepse janë në kushte mjerimi, dhe këtë e thonë mediat. Ndaj dhe duhet të investohen, të çlirohen fondet për investimet në spitale”, tha Berisha.
Sipas tij, Qeveria duhet të nxjerrë vendimet për ushqimet në spitale.
“E dini ju që në Korçë nuk i bënin tamponin një qytetari, sepse i thonin duhet të të bjerë oksigjeni që ta bëjmë”, tha Berisha.
Ish-Kryeministri kërkoi shkarkimin e menjëhershëm të Komitetit Teknik, që e konsideroi si komiteti i konfliktit të interesave.
“U sollën vaksina për të mbuluar skandalin e Nusret, duke mos respektuar asnjë kusht. E dini ju që Pfizer mund të kishte prishur kontratën fare? Pse i vonoi vaksinat Pfizer? E dini ju që janë mbi 6 mijë të vdekur më shumë nga Covid dhe sëmundje të tjera”, tha Berisha.
Sipas tij, situata është dramatike. “Nëse do të vijojë Edi Rama Kryeministër, Shqipëria do të ketë 10-12 mijë të vdekur më shumë”, tha Berisha.
